УИХ дахь МАН-ын бүлгээс Төрийн Байгуулалтын Байнгын хорооны даргад УИХ-ын гишүүн Б.Жавхлангийн нэрийг дэвшүүлж буйг тус бүлгийн дарга Ж.Батжаргал танилцуулав. Нэр дэвшигчээс асуулт асууж, үг хэлэх гишүүн гараагүй бөгөөд хуралдаанд оролцсон гишүүдийн 81 хувь нь УИХ-ын гишүүн Б.Жавхланг Төрийн байгуулалтын байнгын хорооны даргаар сонгохыг дэмжиж, Байнгын хорооны санал, дүгнэлтийг чуулганы нэгдсэн хуралдаанд танилцуулахаар тогтлоо... гэсэн мэдээллийг та бүгд уншиж сонсоо байлгүй.

Ингээд Б.Жавхлан ТББХ дарга болов. Улс төрд бүх юм тооцоотой, нарийн учиртай байдаг. Санамсаргүй томилгоо гэж бараг байдаггүй. Учир нь улс төр, улс удирдана гэдэг бол бодож төлөвлөж хийдэг ажил. Харамсалтай нь МАН энэ бүхнийг зөвхөн өөрсдийн нэрлэдэг “улс төр” гэдэгтээ л ашигладаг. Тэрнээс улс орны аж ахуй, цаашдын төлөвлөлт, ирээдүйн шийдвэрт энэ бодлого гээч нь сууж байх ёстой юм. Даанч тэр талаар МАН огт санаа зовдоггүй нь энэ олон жилийн төр барьж байхад нь харагдаж байна. Тэдэнд энэ “улны” Монгол огт хамаагүй бөгөөд өөрсдөө л дарга болох нь хамгийн их хамаатай чухал ажил нь юм.

За Б.Жавхлан яагаад ТББХ-ны дарга болж байгаа вэ. Энэ байнгын хороо бол бүх хуулийн аман дээр сууж байдаг чухал газар юм. Ялангуяа улс төр, төрийн талаарх бүх хууль журам энэ байнгын хороогоор орж байж цааш явна. Байнгын хорооны санал дүгнэлт ч их чухал. Ялангуяа ерөнхийлөгч, УИХ хоёр хоорондоо толхилцоонтой байгаа цагт ерөнхийлөгчийн итгэлтэй хүн тус байнгын хороог даргалах нь ямар чухал вэ гэдгийг та бүхэн мэдэж байгаа. “Эгүүлэн татах” хуулийг хэлж байна. Бусад хуулиуд ч орно, бас Цэцийн маргаан, шийдвэр зэрэг зөвхөн энэ байнгын хороогоор явна. Эхний удаа эгүүлэн татах хууль Ерөнхийлөгчид чухал, яагаад гэвэл УИХ-ыг дийлэх эсэхээ үзэж байгаа гэсэн үг. Б.Жавхлан бол Ерөнхийлөгчийн итгэлт хүн нь мөн билээ.

Тэр хоёр, бүр гурван ч нутагтай хүн. Сүхбаатар, Говь-Алтай аймгийг өөрийн нутгаа гэдэг. Сүхбаатар аймгаар татан Ерөнхийлөгчтэй нэг зүгийнх гэдгээрээ, бас садан төрлийн хамааралтай ч гэдэг яриа бий. Эдгээр аймгуудад ч нэр хүндтэй.Гурав дахь нь Увс аймагтай холбогддог. Удам судар нь энэ аймгаас гаралтай. Тэгэхлээр “увс” фракцаар дамжин цаашаа Ерөнхийлөгчийн сонгуульд ч нэр дэвших бүрэн магадлалтай гэсэн яриа ч бий. Энэ бол дэл сул яриа биш, сайтар төлөвлөсөн үйлдэл байх бүрэн магадлалтай.

Бид одоо ямар мэдэхгүй биш, "увс" фракц бол нам хамаардаггүй ажилладаг, тэдэнд зөвхөн нутгийн хүчин зүйл л үйлчилдэг гэдгийг. Энэ удаа дээрх фракц өөрийн зүгээс ерөнхийлөгч гаргана гэж их дээрээс ярьж, тэмцэж байгаа. Тэд бол төлөвлөсөн л бол хийж чаддаг хүмүүс. Ийм, ийм учиртайгаар Б.Жавхланг ТББХ-ны даргаар тавьж байгаа гэж улс төр судлаачид үзэж байгаа аж. Үнэн эсэхийг цаг хугацаа гэдэг юм харуулдаг нь сайхан даа.

Өдрийн сонин