Монгол бичгийн улсын XX олимпиад өнөөдөр МУБИС-ийн төв байранд эхэллээ.

Энэ удаагийн олимпиадыг ганцаарчилсан болон анги (баг)-ийн ангилалд хичээнгүй бичиг, хурдан уншлага, зохион бичлэг гэсэн гурван төрлөөр зохион байгуулж байна. Олимпиадын сүүлийн шатны ганцаарчилсан төрлийн багш нарын ангилалд 31 өрсөлдөж байгаа юм. Тэгвэл сурагчдын ангилалд 21 аймаг, есөн дүүргийн 30 оролцогч тунан үлджээ. Харин багийн төрлийн VIII болон X ангийн ангилалд тус бүр 26 бүлэг өрсөлдөж байна. Олимпиадад оролцогчдын тоо жилээс жилд өсөж байгаа бөгөөд нэгдүгээр шатанд багийн төрлийн VIII ангийн ангилалд 1248 бүлгийн 34 мянга орчим сурагч ур чадвараа сорьжээ.

Олимпиадын талаар МУБИС-ийн НХУС-ийн Монгол хэлний тэнхимийн эрхлэгч, “Ертөнц” төвийн тэргүүн, Монгол бичгийн улсын олимпиад зохион байгуулах хорооны дарга Ү.Ариунболд ярихдаа “Олимпиадад оролцогчдын чанар чансаа, чадвар жилээс жилд өсөн нэмэгдэж байгаа нь сайшаалтай. Мөн оролцогчдын тоо ч өссөөр байгаа нь монгол бичгийг сонирхон суралцдаг сурагчид нэмэгдсэний илрэл юм. Тэр хэрээр чадвар нь ахиж байгаа. Энэ жилийн хувьд нэг, хоёрдугаар шатнаас шалгарсан багш, сурагчид сүүлийн даваанд өрсөлдөж байна. Сүүлийн шатанд үлдсэн 30 багшаас 18 нь анх удаа оролцож байгаа юм. Түүнчлэн 10-18 жил оролцсон хашир багш нар олон. Эрэгтэй багш ч нар цөөнгүй хувийг эзлэх болсон нь сайшаалтай” гэв.

Ардын багш Ц.Өнөрбаян “Энэ бол монголчуудын оюуны соёлыг тээж яваа чухал үйл явдлын нэг юм. Хэл бол хүн төрөлхтнийг адгуус амьтнаас ялгадаг хүчирхэг зэвсэг. Харин бичиг үсэг нь нэг соёл иргэншлээс нөгөөхийг ялгадаг гайхамшигт бүтээл. Монголчууд эртнээс бичиг үсгийн баялаг соёлтой ард түмэн. Олон бичиг хэрэглэсэн ч өнөөдөр Монголын ард түмний түүх, соёлыг тээж яваа хоёр нь үлджээ. Үүний нэг нь үндэсний монгол бичиг юм. Монгол бичгийн олимпиадыг анх 20 жилийн өмнө зохион байгуулсан түүхтэй. Эх хэлний үнэлэмж буурч байгаа өнөө үед олимпиадаар дамжуулан монгол бичгийн үнэ цэн, соёлоо дээдлэх үзэлд хүмүүсийг уриалж байгаа юм. Хэдийгээр даяаршлын нийгэмд амьдарч байгаа ч үндэсний хэл, соёлоо өндөрт тавихгүй бол харийн соёлын нөлөөнд орох үзэгдэл хаа сайгүй харагдаж байна. Зөвхөн ЕБС-ийн сурагчдад хичээл зогсохгүй хэрэглээний орчныг бий болгоосой гэж хүсдэг. Монгол бичиг бол монголчуудын оюуны соёлын гайхамшигтай бүтээл юм. Энэ соёлыг монгол хүн бүр сурч, эзэмшиж, хэрэглээ болгоосой гэж хүсмээр байна” хэмээн ярилаа.

Дундговь аймгийн “Хүмүүнлэг” цогцолбор сургуулийн монгол хэлний багш Д.Отгонсүрэн 17 дахь жилдээ энэхүү олимпиадын сүүлийн шатанд шалгаран оролцож байгаа аж. Энэ хугацаанд олон удаа медальт болон тусгай байр эзэлж байсан түүний хувьд “Багш нарын ур чадвар сайжирсныг онцлох нь зөв байх. Би 2004 онд анх зохион байгуулахад нь оролцож байсан анхдагч нарын нэг. Түүнээс хойш 17 дахь жилдээ сүүлийн шатанд шалгаран өрсөлдөж байгаа нь энэ. Энэ жилийн хувьд оролцогч багш нар залуужсан байна. Ер нь өмнөх олимпиадуудаас харахад жилээс жилд багш нарын чадвар дээшилж байгаа. Тиймээс XX олимпиад ч өрсөлдөөн ихтэй байх болов уу. Манай Дундговь аймгийн хэмжээнд л гэхэд багш нар эрс сайжирсан нь мэдэгдэж байна билээ” гэлээ.

Олимпиадын үеэр сурагч Б.Тэлмэний 3D бүтээлийн үзэсгэлэн, мөн багш Л.Амарсанаагийн каллиграфын үзэсгэлэн, сурагчдын хичээнгүй бичгийн үзэсгэлэнд олон нийтэд танилцуулах аж. Улсын олимпиадын аваргууд болон шагналт байрын эзэд өнөөдөр тодорно.