Өнөөдөр Засгийн газрын ээлжит хуралдаан болж өнгөрлөө.

Хуралдаанаар хүүхдийн мөнгийг нэмж 228 мянга орчим хүүхдэд олгохоор шийдвэрлэсэн байна. Ингэснээр 4 дүгээр сарын 1-нээс эхлээд 860 гаруй мянган хүүхэд сар бүрийн тэтгэмжээ авах юм.

2018 оноос зорилтот бүлгийн 60 хувьд хүүхдийн мөнгө олгохоор 164.2 тэрбум төгрөгийг улсын төсөвт тусгасан байна. Харин нэмж олгох мөнгийг төсөвт тодотгол хийхгүйгээр зохицуулах боломжтой гэж үзжээ.

Монголын нийт хүүхдийн тоо нэг сая гаруй. Үүнээс 600 мянга орчим хүүхэд сар бүрийн 20,000 төгрөгөө авч байсан юм. Засгийн газрын өнөөдрийн шийдвэрээр хүүхдүүдийн 80 орчим хувь нь тэтгэмжээ авдаг болж байна.

Мөн 10 дугаар сараас цалин нэмэх тооцоогоо ирэх оны төсөвт оруулж УИХ-аар хэлэлцүүлэх нөхцөл бүрдсэн гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.