Монгол Улсад 2024 онд үйлдвэрлэлийн ослын 809 тохиолдол бүртгэгджээ. Энэ нь өмнөх жилүүдтэй харьцуулахад өссөн үзүүлэлт бөгөөд хөдөлмөрийн аюулгүй байдлын тогтолцоо тодорхой хэмжээнд сул байгааг илтгэж байна. Нэг хүн хөдөлмөрийн чадвараа алдсан тохиолдолд нэг өрхийн эдийн засаг, амьдралын чанар шууд буурдаг бөгөөд энэ нь нийгэмд үзүүлэх сөрөг нөлөөг улам нэмэгдүүлж байна.
Статистик мэдээллээр, үйлдвэрлэлийн осол болон мэргэжлээс шалтгаалах өвчний улмаас Монгол Улсад жилд 127 тэрбум төгрөгийн хохирол учирдаг байна. Мөн 224 мянган хүн буюу нийт хөдөлмөр эрхлэгчдийн 17 хувь нь эрсдэлтэй ажлын байранд ажиллаж байгаа нь анхаарал татаж байгаа юм.
Энэхүү нөхцөл байдлыг эргэн харж, асуудлын гарц гаргалгаа, тогтолцооны шинэчлэлийн талаар хэлэлцэх зорилгоор Монгол Улсын Ерөнхийлөгч У.Хүрэлсүхийн ивээл дор “Хөдөлмөрийн аюулгүй байдал, эрүүл мэндийн III чуулган”-ыг зохион байгуулжээ.
Чуулганы үеэр ГБХНХ-ийн сайд Л.Энх-Амгалан хэлэхдээ:
-
Хөдөлмөрийн осол, мэргэжлээс шалтгаалах өвчний даатгалын тогтолцоо нь урьдчилан сэргийлэхэд хангалтгүй байгаа
-
Хуулийн шинэчлэл хийх шаардлагатай болсон
-
“Хөдөлмөрийн аюулгүй байдал, эрүүл мэндийн тухай хуулийн шинэчилсэн найруулгын төсөл”-ийг УИХ-д өргөн барьж, 2027-2028 онд үндэсний тогтолцоогоо бэхжүүлэх зорилт тавьсан гэж онцоллоо
Чуулганд оролцогчид хөдөлмөрийн аюулгүй байдал, эрүүл мэндийн асуудлыг зөвхөн байгууллагын бус төр, хувийн хэвшлийн хамтын үүрэг хариуцлага гэж үзэн, зохистой хөдөлмөр эрхлэлтийг дэмжих эрхзүйн ба бүтэц зохион байгуулалтын шинэчлэл хийх шаардлагатайг тэмдэглэсэн байна.
Эх сурвалж: Ерөнхийлөгчийн Тамгын газар, ГБХНХЯ
