Европын хамгийн том дууны уралдаан болох “Евровижн-2025” энэ оны тавдугаар сард Швейцарын Базель хотод зохион байгуулагдах гэж байна. Анх 1956 онд Швейцарьт зохион байгуулагдаж байсан уг уралдаан 69 дэх удаагаа явагдаж буй бөгөөд тус улс түүхэндээ гурав дахь удаагаа энэхүү шоуг хүлээн авч буй онцлогтой. Энэ жилийн уралдаан Базель хотын “Санкт-Якобсхалле” нэртэй концертын ордонд болох бөгөөд Женеватай өрсөлдсөний эцэст сонгогджээ.
Тус уралдааны хагас шигшээн тоглолтууд тавдугаар сарын 13, 15-нд, финалын тоглолт тавдугаар сарын 17-нд товлогдсон бөгөөд нийт 37 орны уран бүтээлчид оролцоно. “Их тав” буюу Франц, Герман, Итали, Испани, Их Британи улсууд, мөн зохион байгуулагч Швейцарь орон шууд финалд оролцоно. Үлдсэн орнууд хагас шигшээ шатнаас өрсөлдөн шилдэг 20 нь финалд шалгарна. Түүнчлэн Польшийн Юстина Стечковская, Черногорын Нина Жижич зэрэг өмнө нь оролцож байсан дуучид энэ жил дахин хүч үзэхээр болжээ.
Зохион байгуулагчдын мэдээлснээр энэ жилийн уралдаанд оролцогчдын тав тухыг хангахын тулд камергүй бүсүүд, хаалттай сургуулилалтын өрөө гаргах, амралтын хуваарийг сайжруулах зэрэг шинэчлэлүүдийг нэвтрүүлж байгаа аж. Хөтлөгчөөр Хейзел Брюггер, Мишель Хунцикер, Сандра Штудер нар ажиллах бөгөөд гурван эмэгтэйгээр хөтлөх нь олон төрөл хэл, соёлын бэлгэдэл болно хэмээн тайлбарлажээ.
Тэмцээний ялагчийг таамаглах “Eurovision World”-ын дөрөвдүгээр сарын 14-ний урьдчилсан дүнгээр дараах орнууд ялах магадлалаараа тэргүүлж байна:
-
Швед (KAJ хамтлаг – “Bara Bada Bastu”): 27%
-
Австри (JJ – “Wasted Love”): 20%
-
Франц (Louane – “Maman”): 10%
-
Израиль (Yuval Raphael – “New Day Will Rise”): 6%
-
Нидерланд (Claude – “C’est La Vie”): 5%
Евровижн уралдааны сүүлийн жилүүдийн ялагчдыг дурдвал:
-
2024 – Nemo (“The Code”, Швейцарь)
-
2023 – Loreen (“Tattoo”, Швед)
-
2022 – Kalush Orchestra (“Стефания”, Украин)
-
2021 – Maneskin (“Zitti e buoni”, Итали)
Харин ОХУ дөрөв дэх жилдээ оролцохгүй бөгөөд Европын нэвтрүүлгийн холбооноос (EBU) 2022 онд хасагдсан хэвээр байна. Оросын тал үүний оронд “Intervision” нэртэй шинэ уралдаан зохион байгуулахаар төлөвлөж байгаа аж.
Эх сурвалж: RBC.ru, Eurovision World, Европын нэвтрүүлгийн холбоо (EBU)
