Үндэсний статистикийн хорооноос мэдээлснээр 2025 оны нэгдүгээр улиралд Монгол Улсад 103 улсын 9.9 мянган гадаад иргэн хөдөлмөрийн гэрээгээр ажил эрхэлж байна. Энэ нь өмнөх оны мөн үетэй харьцуулахад 1.8 мянган хүнээр өссөн үзүүлэлт юм.

Хөдөлмөрийн гэрээгээр ажиллаж буй гадаад иргэдийн 8.5 мянга нь эрэгтэй, 1.4 мянга нь эмэгтэй байна. Насны бүлгээр нь авч үзвэл, 35-39 насныхан хамгийн олон буюу 1.8 мянга, 20 хүртэлх насныхан хамгийн бага буюу 115 байна.

Боловсролын түвшнээр:

• Техникийн болон мэргэжлийн боловсролтой: 3.7 мянга

• Бакалавр болон дипломтой: 3.5 мянга

• Бүрэн дунд боловсролтой: 1.3 мянга

• Тусгай мэргэжлийн дунд: 1.1 мянга

• Магистр, доктор: 289

• Суурь болон бага боловсролтой: 105

• Боловсролгүй: 4 хүн байна.

Гадаад иргэдийн 60.2 хувь нь БНХАУ-ын, 6.4 хувь нь Энэтхэгийн, 5.3 хувь нь Вьетнамын, 4.9 хувь нь Филиппиний иргэд байгаа бол үлдсэн хувь нь ОХУ, БНСУ, АНУ, Турк, Австрали болон бусад улсын харьяат байна.

Ажил эрхэлж буй салбарууд:

• Уул уурхай, олборлолт: 2.5 мянга

• Боловсрол: 1.3 мянга

• Худалдаа, засвар үйлчилгээ: 1.2 мянга

• Боловсруулах үйлдвэрлэл: 1.1 мянга

• Барилга: 1.1 мянга

• Тээвэр, агуулах: 608

• Бусад салбар: 1.5 мянга

• Олон улсын байгууллага, төлөөлөгчийн газар: 648 хүн ажиллаж байна.

Уул уурхай, олборлолтын салбар 747 хүнээр нэмэгдсэн бол барилгын салбарын гадаад ажилчдын тоо 219 хүнээр буурсан үзүүлэлттэй байна.

Ажил олгогч байгууллагын ангиллаар:

• ХХК-д: 8.8 мянга

• ТББ-д: 279

• Төрийн өмчит ААН-д: 85

• Төсөвт байгууллагад: 29

• Хувьцаат компанид: 19

• Нөхөрлөлд: 5

• Бусад байгууллагад: 622 хүн ажиллаж байна.

Байршлын хувьд:

• Улаанбаатар болон Төвийн бүс тус бүрд 4.2 мянган хүн

• Зүүн бүсэд: 932

• Баруун бүсэд: 303

• Хангайн бүсэд: 214 хүн ажиллаж байгаа бөгөөд хамгийн их гадаад ажилчинтай аймаг нь Өмнөговь (1.9 мянга), Дорноговь (1.2 мянга), Төв (889), Дорнод (543) байна.

Монгол Улсаас гадаад руу зуучлагдсан ажиллах хүчний тоо буурчээ

2025 оны эхний улиралд Монгол Улсаас 213 хүн хөдөлмөрийн гэрээгээр гадаадад зуучлагдсан нь өмнөх оны мөн үетэй харьцуулахад 111 хүнээр буурсан үзүүлэлт юм. Тэдний 178 нь БНСУ, 35 нь Япон улсыг зорьсон байна.

Зуучлагдсан иргэдийн 175 нь эрэгтэй, 38 нь эмэгтэй бөгөөд:

• 25-29 насныхан 32.9 хувийг эзэлж байгаа бол

• 45-54 насныхан хамгийн бага буюу 1 хувь байна.

Боловсролын түвшнээр:

• Бүрэн дунд боловсролтой: 65

• Бакалавр: 38

• Тусгай мэргэжлийн дунд: 11

• Техникийн болон мэргэжлийн: 5

• Боловсролгүй: 94 хүн бүртгэгджээ.

Салбарын хувьд тэдний ихэнх буюу 164 нь боловсруулах үйлдвэрлэлд, хамгийн цөөн нь буюу 1 нь худалдаа, засварын салбарт ажиллаж байна.

Эх сурвалж: Үндэсний статистикийн хороо