Улсын дуурь, бүжгийн эрдмийн театр ирэх сард романтизмын үеийн сонгодог бүтээл болох А.Аданы “Жизель” бүжгэн жүжгийг шинэчлэн тайзнаа амилуулж, үзэгчдийн хүртээл болгохоор бэлтгэж байна.
Тус бүжгэн жүжиг нь ирэх тавдугаар сарын 10, 11-ний өдрүүдэд тоглогдох бөгөөд ОХУ-ын алдарт “Большой” театрын тэргүүн гоцлооч Анастасия Сташкевич Жизелийн дүрийг бүтээж, ханхүү Альбертын дүрийг тэргүүн гоцлооч Клим Ефимов амилуулах юм. Энэ нь Монголын балетын тайзнаа дэлхийн түвшний гоцлол бүжигчид зочлон оролцож буй ховор тохиолдол гэдгээрээ онцлогтой.
Францын нэрт хөгжмийн зохиолч Адолф Аданын энэхүү бүжгэн жүжиг нь анх 1841 оны зургаадугаар сарын 28-нд Парисын “Гранд Опера” театрт тоглогдож, романтизмын үеийн бүжгэн жүжгийн сор болсон бүтээл хэмээн үнэлэгдсэн байдаг. Харин Монголын тайзнаа уг бүтээл анх 1979 оны арванхоёрдугаар сарын 22-нд Оросын балетмейстер Ф.Г.Кайдани дэглэн тавьж, монголчуудын хүртээл болгожээ.
“Жизель” бүжгэн жүжиг нь хайр, урвалт, уучлалын утга агуулгатай, уран тансаг хөдөлгөөн, гүн утга санаа бүхий сор бүтээл бөгөөд дэлхийн балетын тайзнаа хамгийн олон удаа тоглогдсон бүжгэн жүжгүүдийн нэг хэмээгддэг.
Эх сурвалж: Улсын дуурь, бүжгийн эрдмийн театр
