Энэ жилийн аялал жуулчлалын улирлыг эхлүүлж, үндэсний болон олон орны хоолны соёлыг иргэд, жуулчдад таниулах зорилгоор “UB food” фестивалийг дөрөвдүгээр сарын 8-14-ний өдрүүдэд Сүхбаатарын талбайд зохион байгуулахаар болжээ. Энэхүү арга хэмжээг нийслэлийн Засаг даргын Тамгын газраас санаачлан зохион байгуулж байна.

Фестивалийн онцлох хэсэг нь Узбекистан улсын хоолны амт, соёлыг танилцуулах бөгөөд тус улсын мастер тогоочид алдарт плов, шашлык, казань кебаб, самса зэрэг үндэсний хоолоо жорынх нь дагуу бэлтгэж, зочдод амтлуулна. Мөн Монголын бурхан шашинтны төв Гандантэгчинлэн хийдийн лам нар нэг тонн хэмжээтэй ширмэн тогоонд уламжлалт аргаар гурилтай шөл хийж, монгол хоолны өв соёлыг сурталчлах аж.

Түүнчлэн фестивалийн үеэр дараах үйл ажиллагаанууд болно:

• Dj үзүүлбэр, Open Mic болон “Бага тойрог” урлагийн тоглолт

• Узбекистан улсын бараа бүтээгдэхүүний үзэсгэлэн, худалдаа

• Улаанбаатар театрын болон “Анир” поп оркестрийн тоглолт

• Амьд хөгжмийн концерт, олон төрлийн хоолны уралдаан, тэмцээнүүд

“UB food” нь зөвхөн хоёр орны хоолыг онцлохоос гадна олон улсын хоолны амт чанар, стандарт, үйлчилгээний жишгийг танилцуулж, нийслэлийн хоол үйлдвэрлэл, үйлчилгээний салбарт шинэ өнгө төрх нэмэх, жуулчдын анхаарлыг татах томоохон арга хэмжээ болохыг зохион байгуулагчид онцолж байна. Цаашид тус фестивалийг аялал жуулчлалын чиглэлийн тогтмол арга хэмжээ болгон хөгжүүлэхээр төлөвлөжээ.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс.