Монгол Улсын Хөдөлмөрийн баатар, Ардын уран зохиолч Дэндэвийн Пүрэвдоржийн “Тусгаар тогтнол” шүлгийг энэ сарын 4-нд буюу ирэх баасан гарагт сурагчид Монгол Улсын газрын зураг хэлбэрээр зогсон унших арга хэмжээг Сүхбаатарын талбайд зохион байгуулахаар болжээ.
Эх оронч үзлийг төлөвшүүлэх, тусгаар тогтнолын үнэ цэнийг ойлгуулах зорилготой тус арга хэмжээг нийслэлийн 9 дүүрэг болон 21 аймгийн төв талбайд зэрэг эхлүүлэх юм. Уламжлал болсон уг үйл ажиллагааг анх 2016 онд “Оюуны ундраа” сургууль санаачлан, 3333 сурагч оролцож байв. Энэ удаа тус сургуулийн ахлах ангийн сурагчид 21 аймагт хуваарилагдан орон нутгийн хүүхдүүдтэй хамтран уншихаар хөдөлжээ.
“Оюуны ундраа” сургуулийн захирал С.Нэргүйдаваагийн хэлснээр, “Тусгаар тогтнол” шүлгийг монголын хүүхэд бүр мэддэг болох ёстой. Учир нь энэхүү шүлэгт монгол хэл, соёл, эх орон, түүх бүхэлдээ шингэсэн гэж үзэж байна. Хөтөлбөрийн хүрээнд оюун санааны нэгдлийг дэмжих “шилжин явах цом”-ыг Их эзэн Чингис хааны өлгий нутаг Хэнтий аймгаас эхлүүлэхээр төлөвлөжээ.
Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс.
