Ном ярьж өгье:
Ийм зөгнөлт зохиолыг “Мон судар” хэвлэлийн компаниас эрхлэн гаргасан. Энди Вэйр нь бидний сайн мэдэх “Марсын хүн” буюу (The Martian)-ыг зохиосон хүн юм. Бүрэн хэмжээний киног нь бид сайн мэдэх билээ. Номын нэр эх хэлээрээ “Porject Hail Mary” буюу Аве Мария төсөл гэдэг. Энэ нь эцсийн мөчид аз сорин үзээд алдах гэсэн утга агуулсан хэлц үг аж. Ингэж үзээд л дуусъя гэмээр ч юм уу. Бүтэх эсэхийг нь мэдэхгүй ч хүн төрөлхтөн сүүлчийн найдвараа хөлгүй огторгуйд илгээж байгаа тухай тус номд өгүүлдэг.
Ном шинжлэх ухааны, зөгнөлт төрлийнх юм. Гол баатар Риланд Грейс сансрын хөлөгт ухаан орж байгаагаар зохиол эхэлнэ. Нарны гэрэл буурч байгаа, гучин жилийн дараа гэхэд таван хэмээр буурах болчихоод байгаа аж. Хэрэв тэгвэл дэлхийд мөстлөг болох бөгөөд ургац алдаж өлсгөлөн нүүрлэнэ. Энэ нь петровын шугам хэмээгчээс болжээ. Тэр нь маш өчүүхэн биет бөгөөд 10микрон 18 зэрэгт хэмжээтэй. Тэр нь сугар гариг дээр үүсээд наран дээр гэрлийн хурдаар очин тэнд өсч үржээд буцаад сугар гариг руу нисдэг эд аж. Уг биет нарыг бүрхээд гэрлийг нь хаадаг гэнэ. Нэг ёсондоо нарны эрчим хүчээр амьдардаг аж.
Гол баатар амьдралд ус тийм ч чухал бус гэдэг онол гаргасан хүн аж. Усгүй ч амьдрал байж болно гэж үздэг. Тэгэхлээр нөгөө юм нь усгүй орчинд амьдраад байж таарах байж. Тэгээд мань хүнийг судлуулахаар авна. Нөгөө биетийг астрофаж гэж нэрлэнэ. Астрофаж найман гэрлийн жилийн зайд байгаа одуудыг халдварлуулдаг аж. Гэвч халдвартай оддын яг төвд байгаа Тау Цети хэмээх од уг халдварыг аваагүй байгаа нь мэдэгддэг. Тэр одонд хүрч яагаад халдвар авдаггүй учрыг олох хэрэг дэлхийд тулгарна. Ингээд мань хүнийг хоёр нисэгчтэй хамт уг од руу явуулдаг. Замдаа унтаж байгаад дөхөж ирэхээр нь сэрэх ёстой. Сэрэх цаг болоход нөгөө хоёр нисгэгч нь нас барчихсан, манай хүн ганцаараа үлдсэн байдаг. Тэр цааш ниссээр уг одонд хүрч очиход тэнд бас нэг сансрын хөлөг ирчихсэн байгаа нь тааралдана. Тэр харь гаригийн хөлөг байх бөгөөд тэд хоорондоо холбоо тогтоон харилцаж чаддаг.
Уг хөлөгт зургаан хөл гартай аалзархуу биет байх бөгөөд тэд хардаггүй, зөвхөн дууны долгионоор сонсож мэдэрдэг, уугуул гариг нь маш халуун улайдмал агаартай гаригийнх гэнэ. Тэр хөлөг хориод амьтантай гарсан ч сансрын радиацын туяаг мэддэггүй байж таараад нисэгч нар нь тэр туяаны хордлогоор нас нөгцжээ. Харин мань нөхөр азаар хөдөлгүүрийн хэсэгт унтдаг байж, тэнд нь хөдөлгүүрийн нөлөөгөөр радиац нэвтэрдэггүй учир амь гарсан аж. Тэд нөгөө Тау Цети хэмээх одонд хүрч нөгөө астрофежийг барьж аван судалж байгаад тэднийг ангуучилдаг биет байдгийг олдог. Тэр нь Тау Цети одонд байдаг бөгөөд зөвхөн астрофежээр хооллодог байна.
Тэр биетийг олзворлон буцтал харь гаригийн хийсэн саванд байсан биетүүд саваа нэвт гараад түлшний астрофежийг нь идчихсэн байгааг мэднэ. Манай дэлхийн сав бол байгаа, тэрэнд нөгөө биет дүүрэн байгаа. Харин нөгөө гаригийн сав бол хоосорсон гэдгийг мэдэж цөхөх юм гүй. Тэгэхлээр тэр гаригийн амьдрал мөхнө гэсэн үг. Яг манайх шиг нар нь буурч байгаа учраас тэр. Дэлхий рүүгээ нисгэгчгүй онгоцоор биетээ хүргүүлээд харь гаригийн нисгэгчид туслах хэрэгтэйг ухаардаг… Та уг номноос зөгнөлт зохиолын амт шимтийг бүрэн мэдэрч оюуны цэнгэл эдэлнэ. Уг ном том зузаан, зургаан зуугаад хуудастай.
Ж.Сандагдорж, Өдрийн сонин
