Телевизийн салбарын шилдэг шоу, уран бүтээлүүдийг шалгаруулдаг “Эмми” наадмын 76 дахь удаагийн шагнал гардуулах ёслол АНУ-ын Лос-Анжелес хотын “Пикок” театрт орон нутгийн цагаар ням гаргийн орой амжилттай болж өндөрлөлөө.

Энэ сарын эхээр болсон “Creative Arts Emmy Awards” наадмаас 14 шагнал хүртсэн Японы түүхэн цуврал болох “Shogun” нийт 18 шагнал хүртсэнээр нэг улирлын дээд амжилтыг тогтоожээ. Тус цуврал нь “Шилдэг драмын цуврал” төрөлд тэргүүлснээс гадна Хироюки Санада, Анна Савай нар өөрсдийн бүтээсэн дүрээрээ “Эмми”-гийн цомыг өргөжээ.

Харин “Шилдэг инээдмийн цуврал” төрөлд “Hacks” цуврал шалгарсан бол “Baby Reindeer”, “The Bear” цувралууд тус тус дөрвөн шагнал хүртлээ. Наадмын эхний шагналууд болох шилдэг гол ба туслах дүрүүдийн шагналыг Эбон Мосс-Бакрак, Жереми Аллен Уайт, Лиза Колон-Зайас нар хүртсэн бөгөөд тэд бүгд “The Bear” инээдмийн цувралд тоглосон юм.

Хамтран зүтгэгчдэдээ “Эмми”-гийн шагналыг гардуулан өгсөн олны танил эрхмүүдийн дунд Билли Кристал, Виола Дэвис, Селена Гомез, Стив Мартин, Майя Рудольф, Мартин Шин нар байлаа. Ингээд энэ удаагийн “Эмми” наадмын шилдгүүдийг танилцуулж байна.

Шилдэг драмын цуврал: “Shōgun” 

Шилдэг инээдмийн цуврал: “Hacks”

Шилдэг богино хэмжээний цуврал: “Baby Reindeer” 

Драмын цувралын гол дүрийн шилдэг эрэгтэй жүжигчин: Хироюки Санада, “Shōgun

Драмын цувралын гол дүрийн шилдэг эмэгтэй жүжигчин: Анна Савай, “Shōgun

Драмын цувралын туслах дүрийн шилдэг эрэгтэй жүжигчин: Билли Крудап, “The Morning Show”

Драмын цувралын туслах дүрийн шилдэг эмэгтэй жүжигчин: Элизабет Дебики, “The Crown” 

Инээдмийн цувралын гол дүрийн шилдэг эмэгтэй жүжигчин: Жин Смарт, “Hacks”

Инээдмийн цувралын гол дүрийн шилдэг эрэгтэй жүжигчин: Жереми Аллен Уайт, “The Bear”

Инээдмийн цувралын туслах дүрийн шилдэг эрэгтэй жүжигчин: Эбон Мосс-Бакрак, “The Bear”

Богино хэмжээний цуврал/телевизийн киноны гол дүрийн шилдэг эрэгтэй жүжигчин: Ричард Гадд, “Baby Reindeer”

Богино хэмжээний цуврал/телевизийн киноны гол дүрийн шилдэг эмэгтэй жүжигчин: Жоди Фостер, “True Detective: Night Country” 

Богино хэмжээний цуврал/телевизийн киноны туслах дүрийн шилдэг эрэгтэй жүжигчин: Ламорн Моррис, “Fargo”

Богино хэмжээний цуврал/телевизийн киноны туслах дүрийн шилдэг эмэгтэй жүжигчин: Жессика Ганнинг, “Baby Reindeer” 

Шилдэг реалити/өрсөлдөөнт цуврал: “The Traitors” 

Шилдэг ярилцлагын шоу: “The Daily Show”