Залуусын тодотголтой Дархан хот жилээс жилд өргөжин тэлж өнгө нэмсээр байна. Түүхт жаран жилийн ойгоороо аймгийн засаг дарга Б. Азжаргал кинонд ээлтэй хот болж буйг олон нийтэд зарласан. Гарын таван хуруу, Зүрх зогсохгүй гээд сэтгэлд хоногшсон олон кинонд Дархан хотын тухайн цаг үеийн дүр, төрх түүх болон үлдсэн байдаг. Харин сүүлийн үед хийгдэж буй уран сайхны киноны бүрэн болон хэсэгчилсэн зураг авалтууд Дархан хотод хийгдэж байна.
Хамгийн сүүли гэхэд хүн бүрийн зүрх сэтгэлд хоногшсон сайхан уран бүтээлтэй "Хурд" хамтлаг 30 жилийн ойдоо зориулан “Бүсгүй” бүрэн хэмжээний түүхэн уран сайхны киног бүтээж байна. Тус киноны зарим хэсгийн зураг авалтыг Дархан хотноо наймдугаар сарын 27-ны өдрөөс есдүгээр сарын хоёрны өдрүүдэд хийлээ.
“Бүсгүй” уран сайхны киноны зохиолчоор А.Миеэгомбо, Ерөнхий продюсероор МУГЖ Д.Отгонбаяр, Ерөнхий найруулагчаар Л.Базарсад нар ажиллаж байна. Кино багийнхан тус киног энэ ондоо багтаан дуусгах төлөвлөгөөтэй ажиллаж байна.
Кино багийнхан Дархан-50 цогцолбор, Төмөр замын аравдугаар байр, “Хуримын ордон”-ы орчим, шинэ хорооллын есөн давхар байр, хуучин хорооллын байр, үйлдвэрийн район, “Буян” захын хажуу талын талбайд, Залуучууд театр зэрэг нийт найман байрлалд кино зураг авалт хийжээ.
Тус кино зураг авалтад Улаанбаатар хотоос 50 гаруй уран бүтээлчид ирсэн бол Дархан хотын 200 гаруй иргэд, уран бүтээлч зураг авалтын хугацаанд хамтран ажиллажээ.
"Кинонд ээлтэй Дархан” зорилтын хүрээнд кино бүрэлдэхүүнд аймгийн Соёл, урлагийн газар, Залуучуудын театр, Улаанбаатар Төмөр зам, ХААИС зэрэг төр, хувийн хэвшлийн байгууллагууд дэмжлэг үзүүлж хамтран ажиллажээ.
