Өнгөрсөн долоо хоногт нас барсан Францын кино урлагийн домогт жүжигчин Алэн Делоны хайртай нохойг нь унтуулж, өөртэй нь хамт оршуулах гэрээслэлийг биелүүлэхээс гэр бүлийнхэн нь татгалзжээ.
88 насандаа таалал төгссөн алдарт жүжигчний бельгийн малиноис үүлдрийн Лубо нэртэй 10 настай нохой амьтны эрхийг хамгаалагчдын эсэргүүцлээр амь аврагдсан байна. Делоны охин Анушка нохойг амьд үлдээхээр шийдсэнийг “Briggitte Bardot Foundation” сан мэдээлжээ.
Делоны 1970-аад оны үед худалдаж авсан, Парис хотоос зүүн өмнө зүгт 140-өөд километрийн зайд оршдог өөрийн эдлэн газарт нохойнууддаа зориулж оршуулгын газар байгуулсан бөгөөд өдгөө тэнд Делоны 35 нохой нойрсож байна. Харин амь аврагдсан Лубог 2014 онд амьтны асрамжийн газраас үрчилж авчээ.
2018 онд “Paris Match” сонинд өгсөн ярилцлагадаа Делон “Энэ бол миний сүүлчийн нохой. Би түүнд хүүхэд шигээ хайртай. Амьдралдаа би 50 нохойтой байсан. Гэхдээ энэ нохойтой би онцгой харилцаатай байдаг. Намайг үхвэл тэр маань зовох болно. Нохойгоо миний булшин дээр зовж, шаналахыг харснаас гар дээрээ унтуулах нь дээр” гэж ярьжээ.
Мөн 1996 онд телевизийн сэтгүүлч Делоноос хойд насандаа ямар амьтан болж төрөх хүсэлтэйг нь асуухад “малиноис үүлдрийн нохой” гэж хариулсан байна.
Эх сурвалж: BBC
