Зууны манлай дуучин, МУГЖ, поп хатагтай Б.Сарантуяа жил бүр зохион байгуулдаг төрсөн өдрийн тоглолтоо энэ жил МҮЭСТО-нд хийхээр болжээ.

2000 оноос хойш уламжлал болоод байгаа бөгөөд төрсөн өдрийн тоглолтоо энэ жил "Сэтгэлийн хөг" гэж нэрлэсэн байна.

Гэхдээ энэ удаагийн тоглолтын хамгийн гол онцлог хотын чимэг болсон хуучны барилгуудаа сэргээж, олон хөлийн газар болгох, тэр тусмаа залуучуудад соёлын ордон, театруудыг танилцуулах, шаардлагатай бол сэргээн засварлах, архитектурын өвийг хадгалж үлдээх уриан дор хийх юм байна.

Дуучин Б.Сарантуяа: 

-"МҮЭСТО гадна дотор орчин, техник, гэрэлтүүлэг зэрэг бүх зүйлээ хэвийн хадгалж үйл ажиллагаагаа явуулж байгаа газар учир залуучуудаа уриалж энэ газар тоглолтоо хийхээр болсон. 

Түүнчлэн биет бус өв соёлоо авч үлдэх үүднээс рок поп, эстрад урлагийн хуучны төлөөлөгчдийн нэг "Болор" хамтлагийн гоцлол гитарчин, ая зохиогч, дуучин С.Оргилын надад бэлэглэсэн "Чам руу над руу урсана" дууг "Dual Zet" продакшн болон Америкт амьдардаг "The Mongolian Family"-н Тэмүүжин, Марлаа хоёртойгоо хамтарч сэргээсэн. 

Энэ тоглолтоороо С.Оргилыгоо онцолж байгаа. С.Оргил маань "Болор" хамтлагийнхаа дуунуудаараа хөгжмийн хүрээнийхэнд алдаршсан. Тоглолтод С.Оргил өөрийнхөө анх дуулж гарч ирсэн "Эпилоги" дууг "The Compass" хамтлагийн залуу уран бүтээлч А.Билгүүнтэй хамтарч дуулна. Мөн "Чам руу над руу урсана" дуугаа болон шинээр зохиосон "Хар цагаан хуур" дуугаа дуулна. Хөгжмийн зохиолч Б.Ангирмаа тоглолтонд маань дуулна. Мөн "Киви" хамтлагийнхантай хамтарч бас нэгэн дууг дуулахаар бэлтгэсэн" гэв.

Тоглолт 19-ны 19:00, 20-ны 17:00 цагт МҮЭСТО-нд болно.