Хүн төрөлхтний гоо үзэсгэлэнг шалгаруулах 71 дэх удаагийн “Miss World” тэмцээн маргааш буюу энэ сарын 20-ны өдөр Энэтхэг улсын Нью Дели хотноо эхэлнэ. “Дэлхийн мисс” тэмцээн 20 хоног үргэлжилж, эцсийн шатны шалгаруулалт 2024 оны гуравдугаар сарын 9-ний өдөр зохион байгуулагдах бөгөөд MNC телевизээр бид шууд хүлээн авч үзэх боломжтой юм байна.
Дэлхийн 130 гаруй орны гоо бүсгүй оролцох энэхүү тэмцээнд "Монголын сайхан бүсгүй" тэмцээний Алтан эрдэнийн титэмт, "Miss world Mongolia 2023" тэмцээний Үндэсний ялагч Бат-Эрдэнийн Болор эх орноо төлөөлөн оролцож байна.
Б.Болор нь Үндэсний урлагийн их театрын гоцлол бүжигчнээр ажилладаг бөгөөд 2018 онд Хөгжим бүжгийн коллеж буюу Монгол Улсын Консерваторийг “Бүжгийн жүжигчин” мэргэжлээр, 2023 онд СУИС-ийг “Бүжиг дэглээч, найруулагч” мэргэжлээр төгсчээ.
“Miss World” тэмцээн нь дэлхий дахины энх тайван, эв нэгдлийг сурталчлах, хүмүүнлэгийн далайцтай том ажлуудыг хийх, мөн улс үндэстнүүдийн соёлыг дэлхий дахинд сурталчлан таниулахад чухал үүрэг гүйцэтгэдэг онцлогтой.
Энэ удаагийн "Miss World"-д эх орноо төлөөлөн оролцож буй Б.Болор нь 21 аймгийн 100 гаруй сумын өсвөр насны охид, хөвгүүдэд чиглэсэн “Нандин” төслийг хэрэгжүүлдэг.
“Дэлхийн мисс” тэмцээнд эх орноо төлөөлөн оролцох, оролцогчийн мэдээллийг www.facebook.com/profile фэйсбүүк хуудаснаас авч, дэмжихийг уриалж байна.
