Дэлхий нийтийн анхаарлын төвд байсан Аргентины сонгууль өндөрлөж, Австрийн эдийн засгийн сургуулийг баримтлагч, хэт барууны либертари үзэлтэн Хавьер Милей тус улсын Ерөнхийлөгчөөр сонгогдлоо.
Даваа гаригт болсон хоёр дахь шатны санал хураалтанд Хавьер Милей 55,7 хувийн санал авч үнэмлэхүй ялалт байгуулсан юм.
Сонгуулийн дүн гарсны дараа тэрээр "Аргентины сэргэлт эхэллээ. Энэ бол түүхэн үдэш, гайхамшиг. Манай улсад өргөн тархсан ядуурал, инфляцийн өсөлтөөс үүдсэн эмгэнэлт бодит байдлыг эрс өөрчлөх болно. Төр цомхон байх ёстой. Бизнесийн үйл ажиллагаанд төр оролцдоггүй байх ёстой. Асар их мөнгөөр үйл ажиллагаа явуулдаг, үр ашиггүй яамдуудыг татан буулгана" гэсэн байна.
Тэгвэл сонгуулийн маргааш буюу өчигдөр орой Монголын либертари үзэлтэй залуус цуглаж, Аргентины шинэ ерөнхийлөгчийн ялалтыг тэмдэглэж, сонгуулийн явц болон түүний дэвшүүлсэн бодлогуудын талаар санал бодлоо хуваалцан нэгэн үдшийг өнгөрүүлжээ.
Үзэл санааны энэ баяр дээр АН, ИЗНН, МСДН, ХҮН нам, МАН-ын гишүүн залуус цугласан нь маш сонирхолтой, холимог бүрдэлтэй үйл ажиллагаа болов.
Олон улсын шинжээчид Хавьер Милейгийн ялалтыг "урьдчилан тааварлашгүй, эмх замбараагүй, ирээдүй рүү түлхэж магадгүй үйл явдал болов" хэмээн үнэлжээ. Тэдний зарим нь "Аргентин улс нь зүүний үзэл санааны, халамжийн бодлогын судалгааны "лаборатори" байсан бол одооноос либертари бодлого хэрхэн хэрэгжиж байгаа тухай судалгааны сэдэв боллоо" гэсэн байна.
