Ерөнхий сайд Л.Оюун-Эрдэнэ өчигдөр чуулганы хуралдаанд танхимынхаа шинэ гишүүдийн танилцуулсан. Хууль зүйн сайд, дотоод хэргийн сайдаар Б.Энхбаяр, Хот хариуцсан сайд буюу Улаанбаатар хотын авто замын түгжрэлийг хариуцсан Үндэсний хороон даргаар Б.Дэлгэрсайхан нар ажиллахаар болсон.

Гэвч энэ томилгооноос илүү Ерөнхий сайдын өөрийнх нь хэлсэн үг олон нийтийн дунд шуугиан тариад байна. Тэр “Олон хүмүүс надад хэлдэг. Асуудлыг гаргаж тавьснаараа та нар нийгмийг бухимдуулж байна. Намынхаа нэр хүндийг унагааж байна, журмын нөхдөө хүнд байдалд оруулж байна гэдэг. Т.Аюурсайханд тэгэж хандах надад хэцүү байсан. Байнга янз бүрийн мессэж надад ирдэг. Т.Бадамжунайн гэр бүлээс “ӨШӨӨ АВНА” гэдэг мессэж надад ирсэн. Х.Нямбаатар сайдад бас ирсэн” хэмээсэн.

Тэгвэл энэ мэдээллийг Т.Бадамжунайгийн охин Б.Гаваа үгүйсгэсэн байна. Тэр энэ тухай Өдрийн сониноор дамжуулан хариу тайлбар хийхдээ “Би мессэж явуулсан. Гэхдээ өшөө авна гэж огт бичээгүй. Аав маань саяхан харвалт өгсөн. Тэр өдөр би Л.Оюун-Эрдэнэ рүү “Чамаас болж харвалт өглөө. Хэрэв ингээд амь нас нь эрсэдчихвэл аавынхаа амийг нэхнэ шүү” гэсэн утгатай мессэж явуулсан. Үнэхээр бухимдсан, аавыгаа өрөвдсөн. Гэтэл аавыгаа өрөвдсөн охиных нь үгээр бүхэл бүтэн Ерөнхий сайд хүн улс төр хийгээд л сууж байна. Аавынхаа төлөө хэн ч ингэж мессэж бичнэ. Гэтэл Улсын Ерөнхий сайд хүн мессэж яриад улс төр хийгээд сууж байдаг. Би энэ мессэжийг олон хүнд явуулаагүй. Л.Оюун-Эрдэнэ, Х.Нямбаатар хоёр руу л явуулсан. Үнэхээр хэлэх үг алга” гэсэн байна.