Хамаг Монгол төслийн санаачлагч, удирдагч Монгол Улсын Гавьяат жүжигчин, Бүгд найрамдах Тува Улсын Гавьяат жүжигчин, дуучин С.Жавхлан бие даасан тоглолтоо маргааш буюу энэ сарын 30-нд 14:00 цагаас Төв цэнгэлдэх хүрээлэнд хийх гэж байна. Тэрээр энэхүү тоглолтоо өөрийн уран бүтээлийн сүүлийн тоглолт болно хэмээн мэдэгдээд буй.

Дуучин С.Жавхлан “Хурай” нэртэй шинэ дуугаа дүрсжүүлэн бямба гаригт нийтэд хүргэсэн юм. Тоглолтод нийтийн дууны салбарт нэрээ өргөсөн МУГЖ Т.Баясгалан, Л.Болдбаатар, МУСТА Л.Банзрагч, А.Мөнхбат, Д.Бурмаа, Д.Хишигбаяр, Р.Дэлгэрмаа болон залуу уран бүтээлчид, Монгол Улсын морин хуурын чуулга оролцох аж.

Тоглолтын өдөр дулаахан, нарлаг байх төлөвтэй байгаа бөгөөд зохион байгуулах багийн зүгээс ахмад настай сонсогчдод зориулан “Төв цэнгэлдэх хүрээлэн”-ийн гол хэсэгт тусгай суудал нэмэлтээр зассан байна. Түүнчлэн дуучин С.Жавхлан Өвөр Монгол, Тува, Халимаг, Буриад зон олноо тоглолтдоо мөн урьсан бөгөөд хүрэлцэн ирэх сонсогч түмнээ үндэсний дээлээр гоён ирж, намрын нэгэн уянгалаг үдшийг хамтдаа сэтгэл дулаан өнгөрүүлэхийг уриалж байгаа юм.

Мөн энэ жил МУГЖ С.Жавхлан, Т.Баясгалан нар хамтран дуулсны 25 жилийн ой тохиож байгаа бөгөөд тэд “Дулаахан намар” тоглолтод зориулан хуучны болон шинэхэн уран бүтээлүүдээ хамтран дуулж бэлэг барих аж.

Энэхүү тоглолтын нэг онцлог нь Дэлхийн өнцөг булан бүрд байгаа халуун сэтгэлт монгол ахан дүүстээ зориулан тоглолтын шууд дамжуулалтыг хаалттай группт нэвтэрч чанарын өндөр түвшинд үзэх боломжийг бүрдүүлжээ.