Ерөнхий сайд Л.Оюун-Эрдэнэ хэдэн жилийн өмнө “Монгол Улс жилд 400 сая жуулчин авдаг болно” хэмээн ам халаад ам руугаа алгадуулж байсан цаг саяхан. Түүгээр ч зогсохгүй 400 сая жуулчиндаа үзүүлэхээр Хэнтий аймагт барьсан хэдэн цементен овоолгынхоо заримыг буцааж буулгаж, бариулсан компаниасаа зардлыг нь буцаан татаж төсөвт суутгасан ч тохиолдол гарсан.

Гэсэн хэдий ч цаг хугацаа өнгөрөхийн хэрээр манай аялал жуулчлалын салбар агаарын тооноосоо халширч, арай гэж суурин дээрээ сууж эхэлж байна.

Тухайлбал, БОАЖ-ын сайд Б.Бат-Эрдэнэ сар шинийн дараа news.mn сайтад өгсөн ярилцлагадаа “Биднийг тойрсон дөрвөн бүсэд 238 сая жуулчинтай. Бид нэг саяыг нь татах боломжтой" хэмээн ярьсан байна. Харамсалтай нь энэ нь манай аялал жуулчлалын салбарынхны 15 жилийн өмнөх "мөрөөдөл" юм.

Сануулахад, 2008 онд С.Баярын Засгийн газар байгуулагдаад анх удаа аялал жуулчлалын асуудал хариуцсан яамтай болсны дараа БОАЖ-ын сайд Л.Гансүх “Манай аялал жуулчлалын компаниуд жилд 400-500 мянган жуулчин авч байна. Ядаж жилд сая жуулчин авдаг болчихвол аялал жуулчлалын салбар бүхэлдээ сэргээд ирнэ” хэмээн төлөвлөж, хил орчмын аялал жуулчлалыг хэрхэн хөгжүүлэх талаар ярьж явлаа.

Гэвч Б.Бат-Эрдэнэ сайдын сүүлд өгсөн ярилцлагаас харвал манай аялал жуулчлалын салбар 15 жилийн өмнөхөөсөө огтхон ч ахиагүй, харин ч агшсан шинжтэй байна. Тодруулбал, коронавирусын өмнөх жил буюу 2019 онд Монгол Улс хамгийн их буюу 577 мянган жуулчин авсны 168 мянга нь БНХАУ-аас жуулчны визээр орж ирсэн хятад ажилчид байдаг юм байна.

Б.ЗАЯА