"The Voice of Mongolia" шоунаас төрөн гарсан "NS" хамтлагийн гишүүн Н.Энэрэлсайхан өнгөрсөн долоо хоногийн ням гаригт "B" продакшинтай байгуулсан гэрээний дагуух цалингаа авч чадахгүй байгаа талаараа мэдээлсэн билээ. Түүний хэлснээр тоглолтод оролцсон төлбөрийн 90 хувийг "B Production" авч, 10 хувийг нь уран бүтээлчид өгөх гэрээг хоёр жилийн өмнө хийсэн гэж байсан юм.
Мөн өчигдөр Төрийн соёрхолт дуучин Д.Болдын "B production" асуудалд албан ёсны мэдэгдэл гаргаж, "Н.Энэрэлсайханд гэрээгээр тохирсон хувиа өгдөггүй гэсэн нь худал мэдээлэл бөгөөд уран бүтээлчийг удаа дараа гэрээний үүргээ зөрчсөн. Дахиж олон нийтийн сүлжээнд буруу, ташаа мэдээлэл нийтэлбэл хууль, шүүхийн байгууллагад хандана" гэсэн байв.
Тэгвэл "NS" хамтлагийн гишүүн Г.Саруултуяа өөрийн байр сууриа цахим хуудсаар дамжуулан илэрхийллээ.
Тэрээр "Байдал бүр ийм дээрээ тулах гэж! Энэ бүх хэрэг явдлыг харахад менежерийн артистуудтай харьцдаг зохисгүй харилцаанаас болсон гэж бодож байна. Үүнээс болж хүмүүс хооронд зөрчил үүсч. Хоёр жилийн хийсэн ажлууд минь талаар боллоо" гэжээ.
