Улсын Онцгой комисс хуралдаж, Цагаан сарын баярын өдрүүдээд иргэд болон автомашины хөдөлгөөнийг хязгаарлах эсэх асуудлыг хэлэлцэж, хаах шийдвэр гаргалаа.
Улс, хот хоорондын хөдөлгөөнийг хоёрдугаар сарын 23-ны 08:00 цагаас 27-ны 08:00 цаг хүртэл түр зогсоох шийдвэр гаргажээ.
УОК-ийн дарга Ө.Энхтүвшин: "Нийт 13 аймгийн онцгой комиссын даргаас Цагаан сарын баярын үеэр хөдөлгөөн хязгаарлаж өгөөч гэдэг хүсэлт тавьсан. Үүний дагуу Улс, хот хоорондын хөдөлгөөнийг хоёрдугаар сарын 23-ны 08:00 цагаас 27-ны 08:00 цаг хүртэл түр зогсоох шийдвэр гаргасан. Өвчний оргил үе яг хэзээ эхлэх нь мэдэгдэхгүй байна, гуравдугаар сар эсвэл дөрөвдүгээр сар гээд яг тэр үед гэж ДЭМБ-аас ч хэлж чадахгүй байна" гэлээ.
ОБЕГ-ын дарга Т.Бадрал: "Цаг агаарын байдал хүнд, цас орж, шуурч байна. Хулгайн замаар яваад, цасанд сууж, хамт яваа хүнээ болон өөрсдийгөө, эд хөрөнгө, амь насаараа хохирох аюултай тул ХУЛГАЙН ЗАМААР зорчихгүй байхыг онцгойлон анхааруулж байна. Харин орон нутаг руу зоричох билетээ урьдчилан захиалсан иргэд ямар ч суутгалгүйгээр буцааж болохоор шийдвэрлэсэн" гэв.
УОК нэгдүгээр сараас хойш нийт таван удаа хуралдсан бөгөөд энэ удаагийн хурлаар эхлээд өмнөх хурлуудаас гаргасан шийдвэрийн хэрэгжилтийг дүгнэжээ.
Мөн БНХАУ-д Хаврын баярын үеэр Ухань хотоос 5 сая хүн, улсын хэмжээнд 84 сая хүн шилжилт хөдөлгөөн хийсэн нь өвчний тархалт нэмэдэхэд нөлөөлснийг хүлээн зөвшөөрчээ. Тиймээс УОК хөдөлгөөн хязгаарлах шийдвэрийг гаргажээ.
