Засгийн газрын өнөөдрийн хуралдаанаар сургууль цэцэрлэгийн хөл хорионы хугацааг сунгасан шийдвэр гаргасан. 

Харин сар шинийн өдрүүд буюу шинийн 1-нээс 4-нийг хүртэл орон нутгийн замыг хааж олны хөл хөдөлгөөнийг хязгаарлах асуудлыг хэлэлцээгүй гэж мэдэгдэв. Нийслэлээс орох, гарах болон орон нутгийн замыг хаах асуудлыг УОК-оос шийдэх аж. 

Батлан хамгаалахын сайд Н.Энхболд: "Хятад улс хол хориог гуравдугаар сарын 28-ыг хүртэл сунгасан. Манай улс үүсээд буй нөхцөл байдалтай холбогдуулан гуравдугаар сарын 30-ныг хүртэл хорио, цээрийн хугацааг сунгах шийдвэр гаргалаа. Энэ хугацаанд хичээлийг өмнөх байдалтай адилхан дэглэмээр явуулна. Хорио тавигдсаны дараа хичээлийг нөхөх үүднээс бямба гариг бүрт хичээллэнэ. 

Хот хоорондын хөдөлгөөнийг зарим аймаг хаасан шийдвэр гаргасан байна. Аймгийн засаг дарга нарт дангаараа ийм эрх байхгүй. ЗТЯ-ны сайдтай ярилцаж байж гаргах ёстой байдаг. Үүнийг бид судална. Хот хоорондын хөдөлгөөнийг хаах асуудлыг нөхцөл байдлыг дүгнэж байж шийдвэрлэнэ. 

Спорт заал, фитнессийг хаах шийдвэр гаргаагүй. Найз нөхдөөрөө цуглаад спортоор хичээллэж болно. Албан ёсны арга хэмжээнүүдийг хаасан. Биеийн дархлаа сайжруулах, дасгал хөдөлгөөн хийх нь аливаа вирусийн үеэд хүний дархлаа сайн байх, эмгэг хууч өвчингүй байх нь чухал" гэлээ.