С.Зориг агсны амь насыг хөнөөсөн хэрэгт сэжиглэгдэн, амь насыг нь хэрцгийгээр хөнөөсөн хэргээр Ц.Амгаланбаатар, Б.Содномдаржаа, Т.Чимгээ нар анхан шатны шүүхээс 24-25 жилийн хорих ял сонссон. Мөн үүнээс гадна өнгөрсөн сарын сүүлээр талийгаачийн эхнэр Б.Булганыг мөн яллагдагчаар татаад байгаа. Тус хэрэг илэрсэн цагаасаа өнөөдрийг хүртэл олны эргэлзээг төрүүлсээр байгаа юм. Өчигдөр “Цензургүй” яриа нэвтрүүлэгт талийгаач С.Зоригийн хэргийн 10 дахь ажлын хэсгийн ахлагч, УЕП-ын орлогч Г.Эрдэнэбат оролцлоо. Нэвтрүүлгийн үеэр ярьсан С.Зоригийн хэрэгтэй холбоотой онцлох 10 ишлэлийг хүргэж байна.
- Хэргийг мөрдөн шалгах явцад төрийн нууцтай холбоотой баримтуудыг нууц хэвээр нь үлдээсэн. Үлдсэн хэргийн материалуудыг Засгийн газрын тогтоол, мөн Ерөнхийлөгчийн зарлигаар ил болгосон. Нийтдээ 2 удаа ил болгосон. 71 хуудас материал нууц хэвээр үлдсэн байгаа.
- Анх намайг 2015 онд ажлын хэсгийн ахлагчаар томилогдож ажил хүлээж авах үед 27 хавтаст хэрэг байсан. Прокуророос яллах дүгнэлт үйлдээд хэргийг шилжүүлэхэд 58 хавтаст хэрэг болсон. Шүүхээр хэргийг шийдвэрлээд дуусахад 66 хуудас хавтаст хэрэг байсан. Энэ 66 хавтаст хэргээс хэдэн нь ил болсон гэж хэлэх боломжгүй.
- 1998 оны 10 дугаар сарын 03–ны өдөр мөрдөн байцаагчийн тогтоолоор тус хэрэгт эрүүгийн хэрэг үүсгэсэн. Энэ хугацаанд хэргийг долоон удаа түтгэлзүүлж, буцааж сэргээсэн байдаг. Эрүүгийн байцаан шийтгэх хуульд заасан мөрдөн байцаалтын үйл ажиллагааг түр түтгэлзүүлсэн тохиолдолууд бий. Гэхдээ энэ хэрэгт мөрдөн байцаалтын гүйцэтгэх ажиллагааны хүрээнд эрэн сурвалжлах үйл ажиллагаа тасралтгүй үргэлжилсэн.
- Би энэ хэргийг 10 дахь ажлын хэсгийн ахлагчаар томилогдсон. Бүрэлдэхүүн гэхдээ урсгалаараа өөрчлөгдсөн.
- Шууд утгаараа Ц.Нямдорж сайдын тушаалаар ажлын хэсэг өөрчлөгдөж байгаагүй. Тушаалыг харахад, дөрвөн удаагийн ажлын хэсгийг солих хөдөлгөөн өрнөх үед Хууль зүй, дотоод хэргийн сайд Ц.Нямдорж ажиллаж байх үетэй цаг үе нь таарсан. Ажлын хэсгийн ЦЕГ, ТЕГ, УЕПГ-ын хамтарсан тушаалаар томилогддог.
- Энэ хэрэг тодорхой шатандаа илэрсэн. Тус хэргийн гүйцэтгэгчийн хэргийг илрүүлээд одоо захилагчийг шалгах ажиллагаа явагдаж байна. Захиалагчийг шалгах үед зарим нэг хүмүүст энэ хэргийг илрүүлэхгүй байх сонирхол байна гэж бодож байгаа.
- Хэргийг үйлдсэн хүнийг олж байж захилагчийг олдог. Хэргийн ул мөрний араас л явна. Гэмт хэрэг үйлдсэн газар захиалагчийн ул мөр байдаггүй. Энэ хэргийг зохиомол гэж байгаа нь өөрөө зорилготой үйлдэл.
- Талийгаачийг өнгөрсөн өдөр гэрт нь 74 хүн орсон байдаг.
- Хэргийн газраас С.Зориг болон Б.Булганы гарын хээ олдоогүй. Харин алуурчдын гарын хээ дараагийн шинжилгээгээр тохирсон.
- С.Зоригийн хэргийг шалгах ажлын хэсэгт ажиллаж байсан хүмүүс гадны нөлөөтэй нас барсан нь гэдэг нь нотлогдоогүй. Золгүй байдлаар нас барсан хүн байгаа.
- 1998 оноос хойш тус хэрэгт 42 хүн сэжигтэнээр тооцогдон шалгагдаж байсан.
- Энэ хэрэгт төрийн нууц байгаа. Тийм учраас шүүх хурлыг хаалттай хэлэлцсэн.
- Ялтан Т.Чимгээгийн охин тус хэргийн үеэр зам тээврийн ослоор амиа алдсан. Гадны нөлөөгүй нас барсан байхад хуулийн байгууллага Т.Чимгээгийн охиныг алсан байх уу.
- Б.Содномдаржаа, Т.Чимгээ, Ц.Амгаланбаатар нары хоригдож байгаа нөхцөл байдлын талаар бүх мэдээлэл надад байгаа. Хэдэн удаа эмчид үзүүлсэн хэдэн удаа усанд орсон гэх мэт тэмдэглэлүүд нь байгаа. Б.Содномдаржаа гэхэд 17 удаа эмчид үзүүлсэн тэмдэглэл нь байна.
- Хэрэг гарах үед Б.Содномдаржаа 24, Чимгээ 26 настай, Амгаланбаатар 16 настай байсан.
- 1998 онд зурсан ам зургийг худлаа гэж яриад байгаа. Зургийг зохиогоод зурсан гэвэл хэрэг дотор байгаа материалыг яах вэ.
- 16 настай Ц. Амгаланбаатар хүн алж чадах уу гэдэгт болих хариулт хэлэх байна. 1998 оноос хойш эрүүгийн хэрэгт холбогдсон статистик мэдээлэл байна. 1998 онд насанд хүрээгүй 6 хүүхэд хүнийг санаатай алах гэмт хэрэгт холбогдож байсан.
- Б.Соднодаржаад тариа тарьж мэдүүлэг аваагүй. Энэ бол ташаа мэдээлэл.
- Б.Содномдаржаа хэргээ хүлээсэн. Т.Чимгээ мөрдөн байцаалтын шатнаас өмнө нь олон удаа хэргээ хүлээсэн байдаг.
- Б.Булганыг захиалагчийн хэрэгт сэжиглэж, яллагдагчаар татсан. Гэрч гэдэг бол тухайн хэрэгт хамааралгүй хүнийг хэлнэ.
Сэтгэгдэл (6)