“Disney” компани алдарт “Гэртээ ганцаараа” болон “Музейд өнгөрүүлсэн шөнө” инээдмийн кинонуудын шинэ хувилбарыг шинэ үеийнхэнд зориулан гаргахаар болжээ. Мөн “Бүтэлгүй жаалын өдрийн тэмдэглэл” киноны шинэ хувилбарыг хийхээр болсноо “Disney” компанийн Ерөнхий захирал Роберт Аллен Айгер мэдэгдсэн байна.
“Гэртээ ганцаараа” инээдмийн кино бүтээл бүрэн хэмжээний кино юмуу цувралын аль хэлбэрээр нь дэлгэцнээ гарах нь одоогоор тодорхойгүй байгаа бөгөөд “Disney” компани эдгээр киног “Disney+” стриминг үйлчилгээндээ нэмэх аж. Мөн киноны нээлтийн тов, үйл явдал, жүжигчдийн бүрэлдэхүүн зэрэг илүү дэлгэрэнгүй мэдээллүүд цацагдаагүй байна.
Эргэн сануулахад зул сарын баяраар санамсаргүй тохиолдлоор гэртээ ганцаараа үлдэж, хоёр дээрэмчнээс гэрээ хамгаалдаг бяцхан хүүгийн түүх дэлхий нийтэд анх 1990 онд толилуулагдсан билээ. Маколей Калкины тоглосон энэхүү бүтээл нь нээлтээ хийсэн даруйдаа асар их амжилтад хүрч, шинэ жил, зул сарын баяраар үздэг сонгодог гэр бүлийн кино болсон юм.
