Дэлхий нийтийг байлдан дагуулж, хамгийн нөлөө бүхий дэлгэцийн бүтээл болсон “Хаадын тоглоом” буюу “Game of Thrones” цувралын төгсгөлийн анги өнөө өглөө Улаанбаатарын цагаар 09:00-оос HBO сувгаар цацагдлаа. 

Өнгөрсөн долоо хоногт буюу төгсгөлийн бүлгийн тавдугаар анги цацагдсанаас эхлэн тус цувралын үзэгч, фенүүд анги бүр дээр сэтгэл дундуур байгаагаа илэрхийлж төгсгөлийн бүлгийг дахин хийхийг уриалсан цахим өргөх бичигт гарын үсэг цуглуулж эхэлсэн юм. 

“Game of Thrones”-ын төгсгөлийн бүлгийг нэг анги тутмыг ойролцоогоор 43 сая хүн үзсэн хэмээх тоо гарсан ба энэ нь цувралыг бүх цаг үеийн хамгийн их үзэгчтэй цуврал болгосон билээ. Гэвч шинэ анги гарах бүрт үзэгчдийн сэтгэл ханамж маш хурдацтай буурч төгсгөлийн бүлэг уг цувралын хамгийн бага үнэлгээг авч байгаа юм.

Тус цувралын үнэнч үзэгчид "Төгсгөлийн ангиуд сэтгэлд хүрэхгүй байна, киног бүтээгчид залхуурч үйл явдлыг хэтэрхий шахсан, цувралын жинхэнэ утгыг алдагдуулж эхний бүлгүүдээ гутаасан ангиуд хийлээ" хэмээн дүгнэсэн билээ.

Үүнээс үүдэн цувралын үнэнч үзэгчид төгсгөлийн бүлгийг дахин шинээр бичих хүсэлтийг албан ёсоор гарган, цахим өргөх бичигт одоогийн байдлаар 1,2 сая гаруй хүн гарын үсэг зуржээ.

Уг цахим өргөх бичигт дурдахдаа цувралыг дэлгэцийн бүтээл болгосон найруулагчид болох Давид Бениофф, Д.Б.Вейсс нарыг хасан, тэдний оролцоогүйгээр илүү утга төгөлдөр, хүчирхэг түүхийг бүтээхийг хүссэн ба зарим хүмүүс зохиолч Жорж Р.Р Мартиныг зохиолчоор ажиллуулах санал гаргасан байна.

Хэрвээ та "Game of Thrones" цувралын үнэнч үзэгч бөгөөд танд уг цувралын төгсгөлийн бүлгийн ангиуд таалагдаагүй бол одоо ч гэсэн саналаа өгөх боломжтой юм. Та саналаа ЭНД дарж саналаа өгөөрэй.