Дэлхий нийтийг байлдан дагуулж буй “Хаадын тоглоом” буюу “Game of Thrones” цувралын төгсгөлийн ангиуд HBO сувгаар цацагдаж байгаа билээ. Цувралын төгсгөлийн бүлэг зургаан ангитай бөгөөд одоогоор тав дах анги нь үзэгчдийн хүртээл болоод байна. Харин уг цувралын фенүүд анги бүр дээр хагаралдаж, сэтгэл дундуур байгаа гэдгээ илэрхийлж байгаа аж.

Энэ асуудлыг шийдхээр фенүүд нэгдэж ангиудыг дахин хийхийг уриалсан цахим өргөх бичигт гарын үсэг цуглуулж байгаа ба уг бичигт одоогоор 215 мянга гаруй хүн гарын үсэг зуржээ.

Цувралын фенүүд "Төгсгөлийн ангиуд сэтгэлд хүрэхгүй байна, киног бүтээгчид залхуурч үйл явдлыг хэтэрхий шахсан, цувралын жинхэнэ утгыг алдагдуулж эхний бүлгүүдээ гутаасан ангиуд хийж байна" хэмээн дүгнэжээ.

Тус өргөх бичигт цувралын найруулагчид болох Давид Бениофф, Д.Б.Вейсс нарыг цувралын сүүлийн зургаан ангийг дахин хийхийг уриалсан байна. Уг үйл явдал наймдугаар бүлгийн тавдугаар ангийн дараагаас эхлээд байгаа юм.

Наймдугаар бүлгийн “The Bells” нэртэй тавдугаар ангид гарсан хамгийн чухал эргэлтүүдийн нэг нь Дейенерис Таргариен бүрэн утгаараа “Галзуу хатан” болон хувирч, Долоон хаант улсын нийслэлийг үнсэн нуранги болгосон явдал байсан билээ.

“The Bells” анги тавдугаар сарын 12-нд гарсны дараа нийгмийн сүлжээнүүд Дейенеристэй холбоотой сэтгэгдлүүдээр дүүрч, түүнийг баатрын дүрээс хорон санаатан болгон хувиргалаа хэмээн дургүйцлээ илэрхийлжээ.

“Зохиолч Жорж Р.Р. Мартины 30 жилийн хөдөлмөрийг Д.Бениофф, Д.Б.Вейсс нар 90 минутад сүйрүүллээ” гэж “Annapurna Pictures” компанийн үүсгэн байгуулагч Меган Эллисон твиттер хуудсаараа жиргэжээ. Мөн тэрбээр, Дейенерис олон мянган гэм зэмгүй иргэний амийг аварсны дараа нийслэл хотыг сүйтгэх сэдэл түүнд төрөх боломжгүй гэж бичжээ.

Хэрвээ та "Game of Thrones" цувралын үнэнч үзэгч бөгөөд танд уг цувралын төгсгөлийн бүлгийн ангиуд таалагдахгүй байгаа бол ЭНД дарж саналаа өгөөрэй.

"Game of Thrones" цувралын төгсгөлийн наймдугаар бүлгийн сүүлийн анги ирэх долоо хоногийн даваа гаригийн /монголын цагаар/ өглөө “HBO” сувгаар гарна.