Боловсролын сайд Л.Энх-Амгалан Азийн сангийн дэд ерөнхийлөгч Марк Кэйнигтэй уулзаж, Боловсролын яам Азийн сан хооронд байгуулсан хамтын ажиллагааны санамж бичгийн хүрээнд 2025-2027 онд хэрэгжүүлэх үйл ажиллагааны төлөвлөгөөний хэрэгжилтийн явц, хүрсэн үр дүн, цаашдын хамтын ажиллагааны чиглэлийн талаар санал солилцлоо.
Уулзалтын үеэр талууд төр, хувийн хэвшлийн түншлэлийг өргөжүүлж, цэцэрлэгийн номын сангийн сан хөмрөгийг баяжуулах, сургуулийн өмнөх боловсролын багш бэлтгэдэг их, дээд сургуулиудад сайн туршлагыг түгээн дэлгэрүүлэх, хэрэгжүүлсэн ажлуудын үр нөлөөг үнэлэх чиглэлээр хамтран ажиллахаар тохиролцов.
Мөн хүүхдийн унших чадварыг дэмжих хөтөлбөрийг үргэлжлүүлэн хэрэгжүүлж, шинэчилсэн сургалтын хөтөлбөрийн хэрэгжилтийг дэмжих, сургуулийн номын санг хөгжүүлэх чиглэлээр хамтын ажиллагаагаа өргөжүүлэхээр боллоо. Монгол Улсын Боловсролын яам, Азийн сангийн хамтын ажиллагааны хүрээнд "Өв соёл-Хамтдаа уншъя” аян гэр бүлийн орчин дахь уншлагын дадал, өв соёлыг өвлүүлэх боловсролын оролцоог нэмэгдүүлэхэд томоохон үр нөлөө үзүүлсэн.
Уг аянд 960 цэцэрлэгийн 6634 бүлгийн 163.242 хүүхэд, 94.864 эцэг эх, асран хамгаалагч хамрагджээ. Мөн хүүхдийн номын агуулгыг эцэг эх, багш нарт ойлгомжтой хүргэх зорилгоор 13 цуврал “Номын задлан” видео контентыг цахим сувгуудаар түгээж байна.
Түүнчлэн хүүхдийн номын агуулгыг эцэг эх, багш нарт ойлгомжтой, хүртээмжтэй хүргэх зорилгоор “Номын задлан” цувралын 13 видео контентыг цахим сувгуудаар дамжуулан олон нийтэд түгээж байгаа талаар Боловсролын яамнаас мэдээлэв.
