Оросын “Маша ба баавгай” хүүхэлдэйн кино нь YouTube дээр хамгийн их үзсэн хөдөлгөөнт дүрслэл бүхий зураглал хэмээн Гиннесийн номонд бүртгэгджээ. Хүүхэлдэйн кинон бичлэг нийт 3.4 тэрбум гаруй хандалттай болсон гэж “Animaccord” компанийн хэвлэлийн алба мэдээлжээ.
Оросын хүүхэлдэйн киноны цуврал “Маша ба баавгай”нь анх 2009 онд гарч эхэлсэн юм. Хүүхэлдэйн кино 36 орны хэлээр орчуулагдсан бөгөөд дэлхий даяар 100 гаруй оронд цацагдаж байна. Энэ оны 1-р сард уг төсөл арван жилийн ойгоо тэмдэглэжээ. Өнөөдрийг хүртэл YouTube дээрх “Маша ба баавгай”-н агуулгуудын нийт тоо 42 тэрбумыг давсан байна.
Орос ардын үлгэрээс сэдэвлэн бүтээсэн, сэргэлэн бяцхан охин Маша болон Миша нэртэй баавгайн хөгжилтэй адал явдлыг өгүүлэх тус хүүхэлдэйн киног үзээгүй хүн ховор билээ.
Энэхүү киног Оросын “Animaccord” студи бүтээсэн юм. Барууны эдийн засгийн хориг арга хэмжээнээс болж Оросын гадаад худалдааны ашиг буурч байхад энэхүү хүүхэлдэйн киноны ашиг л жилээс жилд өссөөр байна.
