Төрийн соёрхолт, дуучин, продюсер Д.Болд ирэх сараас Европын орнуудаар аялан тоглолт хийхээр болжээ. Тэрбээр Европт ажиллаж, амьдарч буй монголчууддаа уран бүтээлээ хүргэхээр ирэх сарын 8-ны өдрөөс Швед, Англи, Франц, Бельги, Ирланд, Унгар, Чех, Австри, Герман, Швейцарь, Турк зэрэг улсуудаар тоглох аж.

Дуучин Д.Болд өнгөрөгч оны зургадугаар сард өөрийн 12 дахь шинэ цомог болох "Болд" цомгоо сонсогчдод хүргэсэн. Мөн дуучин Д.Болд бие даасан тав дахь "12 Ертөнц" тоглолтоо 2018 оны 9 дүгээр сард толилуулсан юм. Тоглолтод дуучин Д.Болд 2005 оноос хойш гаргасан бүх цомгийн шилдэг хит болсон 40 дуугаа дээжлэн хүргэж, Монголын хамгийн том заалны тоглолтыг сонсогчиддоо хүргэж сонсогч фенүүдийнхээ талархлыг нь хүлээсэн билээ.