“Нийтээр тэмдэглэх болон тэмдэглэлт өдрүүдийн тухай” хууль, Монгол Улсын Ерөнхийлөгчийн зарлиг, мөн “Үндэсний бичиг соёл, номын өдрүүд”-ийн хүрээнд аймгийн Нийтийн номын сан “Уншлагын 14 хоногийн марафон”-ыг эхлүүлээд байна.

Марафонд ерөнхий боловсролын сургуулийн 8-12 дугаар ангийн сурагчид болон Политехникийн коллежийн оюутан, залуус оролцох боломжтой бөгөөд энэ сарын 15-ны өдрийг хүртэл үргэлжилнэ.

Оролцогчид өдөрт хоёр цагийг номын санд ном уншиж өнгөрүүлэх, ирж буцах цагаа бүртгүүлэх, уншсан номын тэмдэглэл хөтлөх хэлбэрээр идэвхтэй оролцоно. Уралдааны дүнг уншсан номын тоо, оролцооны идэвх, цаг ашиглалт, бүтээлч байдал, мөн цахим орчин дахь хандалт, оролцоог харгалзан гаргаж, эхний гурван байрыг шалгаруулан урамшуулна.

Мөн эдгээр өдрүүдэд аймгийн Нийтийн номын сангаас “Мэдье-Уралдъя” танин мэдэхүйн өдөрлөгийг зохион байгуулж байна. “Хүлээж суухгүй Хүрч үйлчилье” уриан дор зохион байгуулж буй тус өдөрлөг энэ удаад Соого сейкео сургуульд үргэлжиллээ.

Тус үйл ажиллагаа нь уншигчдад ном унших соёлыг төлөвшүүлэх, бүтээлч сэтгэлгээ болон сэтгэн бодох чадварыг хөгжүүлэх, багаар ажиллах ур чадварыг нэмэгдүүлэх, хүүхэд багачуудын танин мэдэхүйн хэрэгцээг хангах, ном, эрдмийг түгээн дэлгэрүүлэх зорилготой.

Өдөрлөгийн хүрээнд “Алтан хонх”, “50 номын хожил”, “Үсэглэлийн хаад” зэрэг танин мэдэхүйн тэмцээнүүдийг зохион байгуулж, мөн номын сангийн уншигчийн үнэмлэх нээх үйлчилгээг хүргэжээ.