Ховд аймагт боловсролын салбарыг хөгжүүлэх, багш, суралцагчдыг дэмжих зорилготой “Ховдын ирээдүй” төсөл, үйл ажиллагаа хэрэгжиж байна.

Төслийн хүрээнд Монгол Улсын их сургуулийн Баруун бүсийн сургуулийн 40 оюутанд нийт 80 сая төгрөгийн тэтгэлэг олголоо.

Анх 2023–2024 оны хичээлийн жилээс эхлэн тус сургуулийн бакалаврын өдрийн ангид математик, физик, хими, гадаад хэлний чиглэлээр 2.8-аас дээш голч дүнтэй суралцаж буй Ховд аймгийн 16 сум болон Жаргалант сумын 12 багаас тус бүр нэг оюутан, мөн элсэлтийн ерөнхий шалгалтад 550-аас дээш оноо авсан 12 суралцагчид аймгийн Засаг даргын нэрэмжит тэтгэлгийг сар бүр 200 мянган төгрөгөөр хагас болон бүтэн жилийн хугацаатай олгож ирсэн.

Харин энэ жилээс тэтгэлгийн журмыг шинэчилж, илүү өргөн хүрээг хамруулахаар шийдвэрлэжээ. Тодруулбал, Монгол Улсын их сургуулийн Баруун бүсийн сургуулийн бакалаврын өдрийн ангид 600 ба түүнээс дээш оноотой элссэн, 3.0 ба түүнээс дээш голч дүнтэй оюутнуудад харьяалал, мэргэжил үл харгалзан тэтгэлэг олгохоор болсон байна.

Шалгуур хангасан оюутнууд энэ сарын 29-ний өдөр аймгийн удирдах ажилтнуудаас Засаг даргын нэрэмжит тэтгэлгийн батламж гардан авсан тухай Ховд аймгийн ЗДТГ-аас мэдээллээ.