Азийн хөгжлийн банкны Монгол дахь Суурин төлөөлөгчидтэй Боловсролын сайд Л.Энх-Амгалан уулзаж, хамтран хэрэгжүүлж буй төсөл, хөтөлбөрийн явц, цаашдын хамтын ажиллагааны чиглэлээр санал солилцлоо.

Азийн хөгжлийн банкны санхүүжилтээр Боловсролын салбарт гурван төсөл хэрэгжүүлж байна. “Эдийн засгийн хүндрэлийн үед боловсролын чанар, хүртээмжийг сайжруулах” төслийн хүрээнд долоон сургууль, 14 цэцэрлэгийг ашиглалтад оруулаад байна. Мөн уг төслийн эхний нэмэлт санхүүжилтийн хүрээнд гурван сургууль, зургаан цэцэрлэгийн барилгын ажил үргэлжилж, шаардлагатай тавилга, тоног төхөөрөмжийг хангаж байгаа юм.

Үндсэн төслийн үр дүнд сургуулийн хүчин чадлыг 3400 суудал, цэцэрлэгийн орны тоог 2325 нэмэгдүүлсэн бол эхний нэмэлт санхүүжилтийн төслүүд бүрэн хэрэгжүүлж дууссанаар дахин 960 суудал, 940 ор нэмэгдэх юм. Түүнчлэн хоёр дахь нэмэлт санхүүжилтийн төсөл 2025 онд Улсын Их Хурлаар батлагдаж, сургууль, цэцэрлэгийн барилга болон өргөтгөлийн ажлын бэлтгэл хангаж байна.

Хамтын ажиллагааны хүрээнд цаашид цахим даалгаврын сангийн системийг сайжруулах, цахим сурах бичиг хөгжүүлэх, Боловсролын удирдлага мэдээллийн системийг боловсронгуй болгох ажлыг хэрэгжүүлэхээр төлөвлөжээ.

Мөн Азийн хөгжлийн банкны буцалтгүй тусламжаар шинжлэх ухаан, технологийн лаборатори, виртуал анги байгуулах төсөл хэрэгжихээс гадна нийслэл болон орон нутгийн дотуур байртай сургууль, гэр хорооллын бүсийн сургуулиудад жендерт суурилсан хүчирхийллээс урьдчилан сэргийлэх, хариу үйлчилгээг бэхжүүлэх төсөл энэ онд эхлэх талаар Боловсролын Яамнаас мэдээлэв.