Боловсролын сайд Л.Энх-Амгалан “Google for Education” төслийн багийн төлөөлөлтэй уулзаж, боловсролын салбар дахь цахим шилжилт болон хиймэл оюуны хэрэглээг өргөжүүлэх асуудлаар санал солилцлоо.

Тус хамтын ажиллагаа анх Боловсрол, мэдээлэл технологийн төвөөс багш нарын цахим болон танхимын сургалтыг дэмжих чиглэлээр эхэлсэн байна. Өнөөдрийн байдлаар багш, сурагчдыг чадавхжуулах Gemini академи хөтөлбөр, “Мэдлэ” контентын сан Google Classroom-д Add-on болж нэмэгдээд байна. 2025 оны бадлаар Gemini академид нийт 2.491 багш сургалтад хамрагдаж, 104 багш төгсжээ.

Уг хөтөлбөрөөр дамжуулан багш нар Gemini болон NotebookLM зэрэг хиймэл оюуны хэрэгслийг сургалтын үйл ажиллагаандаа ашиглах арга зүйд суралцаж, хичээлийн төлөвлөгөө, тест, үнэлгээний рубрик боловсруулах чадвараа сайжруулжээ. Хөтөлбөрийн үр дүнгээс харахад багш нарын цахим ур чадвар дээшилж, ажлын ачаалал буурсан бол сурагчдын хувьд Google-ийн хэрэгслийг ашиглах сонирхол нэмэгдээд байна. Мөн эдгээр хэрэгсэл нь сурагчдын STEAM болон нийгэм, сэтгэл хөдлөлийн чадварыг хөгжүүлэхэд эерэг нөлөө үзүүлж байгааг багш нар онцолжээ.

Цаашид уг төслийн хүрээнд Gemini академийг өргөжүүлж, хүүхэд бүр компьютертэй байх зорилт дэвшүүлж байна. Судалгаагаар 20 хүүхдийн нэг нь компьютертэй байгаа нь энэ чиглэлд анхаарах шаардлагатайг харуулж байна.

Мөн хиймэл оюуныг монгол хэл дээр хөгжүүлж, хүүхдүүдийг эх хэлээрээ зөв ярьж, бичиж сурахад ашиглах боломжийг нэмэгдүүлэх нь чухал ач холбогдолтойг онцоллоо. Таблет төхөөрөмжийг сургалтад ашиглаж байгаа ч сурагчдын хэрэгцээг бүрэн хангаж чадахгүй байгаа тул зөвхөн төхөөрөмжөөс гадна цахим дэд бүтэц, чанартай боловсролын контентыг бүх түвшинд хөгжүүлэх шаардлагатайг уулзалтын үеэр дурдсан талаар Боловсролын яамнаас мэдээлэв.