Төвийн бүсийн физикийн олимпиадыг энэ сарын 27-ны өдөр Өвөрхангай аймагт зохион байгууллаа.

Тус олимпиадад Архангай, Баянхонгор, Булган, Өвөрхангай, Өмнөговь, Төв аймгийн физикийн 27 багш болон 8-12 дугаар ангийн 223 сурагч оролцжээ.

Өмнөговь аймгаас Даланзадгад сумын 1, 3, 4, 5 дугаар сургуулийн 2 багш, 7-12 дугаар ангийн 17 сурагч нийт 19 хүний бүрэлдэхүүнтэй баг оролцсон байна.

Физикийн олимпиад нь сурагчдын логик сэтгэлгээ, асуудал шийдвэрлэх чадвар, мөн физикийн гүнзгий мэдлэгийг хөгжүүлэхээс гадна дэлхийн шинжлэх ухааны чиг хандлагыг ойлгоход чухал үүрэгтэй. Өвөрхангай аймгийн сурагчид сүүлийн арван жил элсэлтийн шалгалтад физикийн хичээлээр тогтмол эхний таван байрт ордог бол Өмнөговь аймгийн сурагчид 8-15 дугаар байрт жагсдаг.

Өмнөговь аймгаас физикийн олимпиадад 11 дугаар ангийн ангилалд Даланзадгад сумын 3 дугаар сургуулийн сурагч Э.Номин мөнгөн медаль, 5 дугаар сургуулийн сурагч Н.Итгэл хүрэл медаль хүртжээ. Харин 10 дугаар ангийн ангилалд тус сургуулийн сурагч Б.Цэцэгсүрэн мөнгөн медаль, 9 дүгээр ангийн ангилалд Даланзадгад сумын 1 дүгээр сургуулийн сурагч Ч.Маргад-Эрдэнэ алтан медаль хүртжээ. Харин 8 дугаар ангийн ангилалд Даланзадгад сумын 5 дугаар сургуулийн сурагч З.Эрболд, Б.Ананд нар мөнгөн медалийн эзэд боллоо.

Мөн багийн дүнгээр Өмнөговь аймгийн 1 дүгээр баг гутгаар байр эзэлжээ.

Энэ жилийн төвийн бүсийн физикийн олимпиад нь олон үе шаттай онол, туршилт хосолсон, "Их сорил-2026" нэмэлт шалгаруулалт орсон, улс даяар өргөн оролцоотой болжээ.