Увс аймгийн Цагаанхайрхан сумын Хунт багийн малчин Х.Хүрэлбаатарын хар хүзүүтэй эм хонь энэ амралтын өдөр дөрвөн ихэр хурга гаргажээ.
Тодруулбал, Сумын аварга малчин Х.Хүрэлбаатарын хотонд ховорхон тохиох дөрвөн ихэр хурга мэндэлж, хаврын хавсрагатай хүндхэн өдрүүдэд малчин хүн нөр их хөдөлмөрийнхөө үр шимийг хүртжээ.
Монголчууд дөрвийн тоог "тэгш дүүрэн"-ий бэлгэдэл хэмээдэг. Дөрвөн ихэр хурга мэндлэх нь мал сүргийн үүд нээгдэж, мянга түмээр өсөхийн дохио гэдэг байна.
Мал дөрөв ихэрлэх нь тухайн жилийн мал төллөлтийн өнгийг тодорхойлж, нутаг олноороо зуншлага сайхан, идээ цагаа элбэг байхын бэлгэдэл хэмээн малчид ам сайтай байна.
Монгол хүн мал сүргээ "эрдэнэ" хэмээн дээдэлж, төл бүрийг нь тэнгэрийн хишиг хэмээн бэлгэшээдэг. Тэр дундаа хотондоо ихэр төл хүлээн авах нь тухайн айл өрх, нутаг усны хийморь лундаа сэргэж, олз омог, өсөлт үржлийг дууддаг эртний сайхан ерөөлтэй билээ.
