Арвайхээр сумын ерөнхий боловсролын 4 дүгээр сургууль “Мянган ном” төслийг өнгөрөгч есдүгээр сараас эхлэн амжилттай хэрэгжүүлж байна.
Төслийн хүрээнд сургуулийн стратеги төлөвлөгөөг боловсруулж, номонд дуртай, нөхөрсөг, хорт зуршилгүй хүүхдийг төлөвшүүлэн бий болгох зорилтыг дэвшүүлэн ажиллаж байгаа юм. Аймгийн ЗДТГ-ын дэмжлэгээр сургуулийн номын санг сурагчдын нас, сэтгэхүйн онцлогт тохирсон монгол болон англи хэл дээрх 1400 гаруй номоор баяжуулж, ном унших дадал, хэвшлийг төлөвшүүлж байна.
“Өнгөрсөн жилүүдийн судалгаанаас харахад хүүхдүүд унших, уншсанаа ойлгоод ярих, бичих чадвар тааруу байсан бол одоогоор харьцангуй сайжирч, бие биеэ ойлгож, хүндэтгэх нөхөрсөг харилцаа бий болж байна. Хичээлийн жилийн төгсгөлөөр дахин судалгаа явуулж, эцсийн үнэлгээг гаргана” хэмээн тус сургуулийн захирал Г.Лхагва хэллээ.
Сурагчдын бие даалтын долоо хоног эхэлж байгаатай холбогдуулан анги, хамт олноороо номын хэлэлцүүлэг өрнүүлэх, номын баатрын дүрд хувирах, шүлэг, өгүүллэг, зүйр үг зохиох зэрэг бүтээлч ажлуудыг багтаасан “Номын өдөрлөг”-ийг зохион байгуулжээ.
