Нийслэлийн ерөнхий боловсролын сургуулиуд төрийн далбаа мандуулах ёслолыг энэ сарын 27-нд нээхээр бэлтгэл ажлыг хангаж байна.
Уг үйл ажиллагааг Нийслэлийн Иргэдийн Төлөөлөгчдийн хурлын дарга А.Баярын санаачилсан “Эх оронч сурагч” хөтөлбөрийн хүрээнд зохион байгуулж байгаа юм. Тус хөтөлбөрт өнгөрсөн онд нийслэлийн 64 сургуулийн 235.131 сурагч хамрагдаж, хүүхэд, залуучуудыг эх орныхоо түүх, соёлын үнэт зүйлсээр бахархах, хариуцлагатай, ёс зүйтэй иргэн болгон төлөвшүүлэхэд чиглэсэн ажлыг хийжээ. Энэ жил хөтөлбөрийг нийслэлийн бүх ерөнхий боловсролын сургуулийг хамруулан өргөжүүлэхээр болсон байна.
Өнгөрсөн жилийн хэрэгжилтийн үр дүнгээс дурдвал, 43 сургуульд “Эх оронч сурагч” клуб байгуулж, 231 үйл ажиллагааг зохион байгуулсан байна. Мөн хичээл эхлэхийн өмнөх “1 минутын хөтөлбөр”-өөр дамжуулан 755 мянга орчим хүнийг эерэг хандлага төлөвшүүлэх үйл ажиллагаанд хамруулжээ. Үүнээс гадна сургалт, нөлөөллийн үйл ажиллагаанд 800 мянга гаруй сурагч, эцэг эх, багш нар оролцож, сурагчдын оролцоотой 987 сайн дурын ажлыг зохион байгуулсан байна. Түүнчлэн 54 мянган сурагч төрийн далбаа мандуулах, буулгах ёслолд оролцжээ.
“Эх оронч сурагч” хөтөлбөр нь сурагчдын идэвх оролцоонд тулгуурласан, эх оронч хүмүүжил олгох бодит үр дүнтэй санаачилга болж, жилээс жилд цар хүрээгээ тэлж байгааг албаныхан онцолж байна.
