Дэлхийд үнэлэгдэх ур чадварыг дэргэдээсээ авах боломжийг олгох “Google” компанийн албан ёсны эрхтэй “Grow with Google Mongolia” хөтөлбөрийн гурав дахь удаагийн нээлтийн үйл ажиллагаа энэ сарын 15-нд боллоо.

Дэлхийн зах зээлд хамгийн эрэлттэй 2026 оны дижитал ур чадварыг олон улсын арга барилаар богино хугацаанд эзэмшиж, мэргэжлийн гараагаа тавин, өөрийн карьер, ур чадварыг дараагийн түвшинд гаргах боломжтой тус хөтөлбөрийн гурав дахь элсэлтэд 300 гаруй залуучууд хамрагдсан байна.

Уг нээлтийн үеэр Соёл, спорт, аялал жуулчлал, залуучуудын Дэд сайд Г.Дашням “Бид өнөөдөр залуучуудын хөгжлийг зөвхөн нийгмийн бодлогын хүрээнд бус, эдийн засгийн өсөлт, үндэсний өрсөлдөх чадвар, бүтээлч үйлдвэрлэл, аялал жуулчлал, соёлын инновац, спортын менежмент зэрэг өргөн хүрээнд харах хэрэгтэй болсон. Дижитал ур чадвартай, санаачилгатай, бүтээлч сэтгэлгээтэй залуучууд манай улсын хамгийн үнэ цэнтэй хөрөнгө юм. Залуучуудыг чадавхжуулах асуудал зөвхөн нэг салбарын, нэг байгууллагын, эсвэл зөвхөн төрийн хийх ажил биш. Энэ нь төр, хувийн хэвшил, боловсролын байгууллага, олон улсын түншлэл, иргэний нийгмийн хамтын хүчин чармайлт шаардсан үндэсний хэмжээний зорилт юм. “Grow with Google Mongolia” хөтөлбөр шинэ хамтын ажиллагааны тод жишээ гэж харж байна. Дэлхийн хэмжээний мэдлэг, хэрэгсэл, платформыг монголын залуучуудтай холбож буй энэхүү санаачилга олон залуучуудын амьдралд бодит өөрчлөлт авчирна гэдэгт итгэлтэй байна” гэв.

Тус үйл ажиллагаанд УИХ-ын дарга Н.Учрал, Соёл, спорт, аялал жуулчлал, залуучуудын Дэд сайд Г.Дашням, “Google” компанийн Монгол дахь суурин төлөөлөгч Э.Өсөхбаяр нар болон хамтрагч байгууллагын төлөөлөл, хөтөлбөрийн үндсэн багш нар оролцож, оролцогчдод мэндчилгээ дэвшүүлэн цаашид энэхүү хөтөлбөрийг хэрхэн хөгжүүлэх талаар санал, төлөвлөгөөгөө хуваалцсан талаар ССАЖЗЯ-наас мэдээллээ.