Польшийн Засгийн газрын 2026-2027 оны хичээлийн жилийн тэтгэлэгт хөтөлбөрийн бүртгэл эхэллээ.
Энэхүү хөтөлбөрийг “Дээд боловсролын салбарт 2021-2027 онд хамтран ажиллах тухай Монгол Улсын Боловсрол, шинжлэх ухааны яам, Бүгд Найрамдах Польш Улсын Боловсрол, шинжлэх ухааны яам хоорондын хөтөлбөр”-ийн хүрээнд зарлаж буй юм. Монгол Улсын 22 иргэнийг Польшид бакалавр, магистр болон бакалавр-магистр хосолсон хөтөлбөрт шалгаруулна.
Тэтгэлэгт хамрагдсанаар Польш Улсын Шинжлэх ухаан, дээд боловсролын яамны харьяа төрийн өмчийн их сургуулиудад сургалтын төлбөрөөс чөлөөлнө. Боловсролын зээлийн сантай гэрээ байгуулж, амьжиргааны зардалд сар бүр 440 ам.доллар тооцон, улирал тутам олгох зэрэг давуу талтай. Үүнд дотуур байр болон хоолны зардал багтжээ.
Тус тэтгэлэгт хөтөлбөрт элсэхийг хүсэгчид дараах шаардлагыг хангасан байх ёстой.
-Монгол Улсын иргэн байх
-Бакалаврын хөтөлбөрт: ЕБС-ийн 12-р ангийн сурагч, ЕБС төгсөгч эсвэл магадлан итгэмжилсэн их, дээд сургуулийн 1-2-р дамжааны оюутан байх
-Магистрын хөтөлбөрт: Бакалаврын зэрэгтэй, голч дүн 3.2 ба түүнээс дээш, 2-оос доошгүй жил ажилласан туршлагатай байх
-Польш эсвэл англи хэлний B2 ба түүнээс дээш түвшний мэдлэгтэй байх
-Польш хэлээр суралцах тохиолдолд нэг жилийн хэлний бэлтгэл хийх боломжтой
-Засгийн газрын эрэлттэй, тэргүүлэх мэргэжлийг сонгон суралцахыг дэмжинэ.
Монголын тал эхний шатны баримт бичгийн сонгон шалгаруулалтыг, Бүгд Найрамдах Польш Улсаас Монгол Улсад суугаа Элчин сайдын яам ярилцлагыг зохион байгуулах юм. 2026 оны 3 дугаар сарын 11-нээс 4 дүгээр сарын 10-нд scholarship.esis.edu.mn вэб сайтаар бүртгүүлнэ.
