Боловсролын яамны Нэгдсэн төслийн удирдах хорооны анхдугаар хурал өчигдөр болж, гадаад, дотоодын санхүүжилттэй төслийн хэрэгжилт, 2026 оны төлөвлөгөө болон цаашдын зохион байгуулалтын асуудлыг хэлэлцлээ.
Тус хурлаар Азийн хөгжлийн банкны санхүүжилттэй “Эдийн засгийн хүндрэлийн үед боловсролын чанар, хүртээмжийг сайжруулах” L3549-MON, L4488-MON төслийн явцыг танилцуулж, ирэх оны үйл ажиллагаа, худалдан авах ажиллагаа, санхүүгийн төлөвлөгөөг баталсныг Боловсролын яам мэдээлэв.
Мөн Азийн хөгжлийн банк болон Японы ядуурлыг бууруулах сангийн хамтарсан буцалтгүй тусламжаар хэрэгжүүлж буй “ЕБС-иудад шинжлэх ухаан, технологийн боловсрол олгох инноваци, хамтын ажиллагааг дэмжих” G9256-MON төслийн 2026 оны төлөвлөгөөг хэлэлцжээ. Түүнчлэн Японы Олон улсын хамтын ажиллагааны нийгэмлэг /ЖАЙКА/-ийн санхүүжилттэй “Инженер технологийн дээд боловсрол” MON-P11 төслийн хэрэгжилтийн явцтай танилцаж, 2026 онд хэрэгжүүлэх үйл ажиллагаа, худалдан авах ажиллагаа, санхүүгийн төлөвлөгөөг баталсан байна.
MON-P11 төслийн хүрээнд 2026 оны гуравдугаар сараас наймдугаар сар хүртэл зохион байгуулах сургалт, судалгааны ажлууд болон Япон Улсад ажиллах зочин судлаачдын нэрсийг танилцуулж, хамрагдсан судлаач багш, байгууллагуудад олгох санхүүжилтийн асуудлыг шийдвэрлэжээ.
