“Бага насны хүүхдийн цогц хөгжлийг дэмжих үйл ажиллагаа 2023-2026”-ний хэрэгжилтийг эрчимжүүлэх зорилгоор Боловсролын дэд сайдаар ахлуулсан орон тооны бус зөвлөл хуралдаж, 2026 онд хэрэгжүүлэх тэргүүлэх чиглэл, үйл ажиллагааг тодорхойллоо.
Боловсрол, эрүүл мэнд, нийгмийн хамгааллын салбарын уялдаа холбоог бэхжүүлж, бага насны хүүхдийн эрүүл мэнд, хоол тэжээл, асаргаа хамгаалал, хөгжил, боловсролын үйлчилгээний чанар, хүртээмжийг сайжруулахад чиглэсэн үйл ажиллагааг 2026 онд хэрэгжүүлэхээр санал нэгдсэнийг Боловсролын яам мэдээлэв. Үүнд:
- Эхийн хэвлийд ураг бүрэлдэх үеэс эхлэн амьдралын эхний 1000 хоногт хүүхдийн хөгжил, өсөлтийг дэмжих, эх, хүүхдийн эрүүл мэнд, хоол тэжээл, асаргаа хамгааллын чиглэлээр эцэг эх, асран хамгаалагчдад зориулсан хөтөлбөр, гарын авлага боловсруулах, хэрэгжүүлэх
- Эх, хүүхдийн эрүүл мэндийн цахим дэвтэрт 9, 18, 36 сартай хүүхдийн хөгжлийн мэдээллийг эцэг эх заавал оруулах талаар нөлөөллийн ажил зохион байгуулах
- 2-6 хүртэлх насны хөгжлийн бэрхшээлтэй хүүхдийн сургуулийн өмнөх боловсролын хамрагдалтыг нэмэгдүүлж, цогц хөгжлийг дэмжих
- Хүүхэд хөгжил, хамгааллын салбар дундын үйлчилгээг мэдээллийн системд уялдуулах
2026 онд хамтын ажиллагааг улам бэхжүүлж, “Бага насны хүүхдийн цогц хөгжлийн үйл ажиллагааны төлөвлөгөө 2027-2030”-г боловсруулан батлуулж, салбар дундын бодлого, хэрэгжилтийн уялдааг ханган ажиллах юм.
Тус зөвлөлийн бүрэлдэхүүнд Боловсролын яам, Эрүүл мэндийн яам, Гэр бүл, хөдөлмөр, нийгмийн хамгааллын яамны Төрийн нарийн бичгийн дарга нар, холбогдох газрын дарга нар болон НҮБ-ын Хүүхдийн Сан, Хөгжлийн бэрхшээлтэй хүүхэдтэй эцэг эхийн холбооны төлөөлөл багтдаг.
