Санхүү, технологийн чиглэлээр мэдээлэл хүргэдэг РБК портал 2025 онд фото зураг авалт, тоглоом, зохиомол оюун ухаанд суурилсан хэрэглээнд хамгийн тохиромжтой шилдэг смартфонуудын жагсаалтыг танилцууллаа. Энэхүү чансаанд хиймэл оюун ухааны боломж, гүйцэтгэл, камерын хүчин чадлыг гол шалгуур болгосон төхөөрөмжүүд багтжээ.

Samsung Galaxy S25 Ultra

Samsung-ийн тэргүүн загвар Galaxy S25 Ultra нь Android үйлдлийн системтэй ухаалаг гар утаснуудын жишиг загвар хэмээн үнэлэгдлээ. Тус төхөөрөмж нь Snapdragon 8 Elite чипээр тоноглогдсон бөгөөд хиймэл оюун ухаанд суурилсан олон төрлийн функцтэй. Эдгээр боломж нь өдөр тутмын ажил, контент засварлалт, бүтээмжийг илүү хялбар, хурдан болгох давуу талтай аж.

iPhone 17 Pro Max

Apple компанийн шинэ үеийн iPhone 17 Pro Max загвар нь шинэчлэгдсэн дизайн болон автоматжуулалтын өндөр түвшнээр онцлог болжээ. Тус утас нь 8 дахин их оптикийн зумтай шинэ камертай болж, зураг, видео бичлэгийн чанарыг шинэ түвшинд гаргасан байна.

Google Pixel 10 Pro XL

Google Pixel 10 Pro XL нь камерын чанараараа хамгийн өндөр үнэлгээ авчээ. Өөрийн хөгжүүлсэн Tensor G5 чип нь хиймэл оюун ухаанд суурилсан өндөр ачаалалтай өгөгдлийг боловсруулахад зориулагдсан. Мөн Camera Coach хэмээх функц нь хэрэглэгчид зураг авах зөвлөгөө өгдөг “хиймэл оюун ухаан-дасгалжуулагч” болж чаддагаараа онцлог юм.

OnePlus 15

OnePlus 15 нь гүйцэтгэл, зай хураагуур, үнэ цэнийн хувьд хамгийн тэнцвэртэй загваруудын нэгээр нэрлэгдэв. Уг төхөөрөмж нь Snapdragon 8 Gen 5 Elite процессортой бөгөөд 7300 мА.цагийн багтаамжтай батерей нь хоёр хүртэл хоног тасралтгүй ашиглах боломжийг олгож байна.

Xiaomi 15 Ultra

Фото зураг авалтын чиглэлээр энэ жил Xiaomi 15 Ultra манлайлав. Тус утас нь 200 мегапикселийн перископ дурантай оптикийн системээр тоноглогдсон бөгөөд 28 дахин ойртуулж зураг авахад чанар алдахгүй гүйцэтгэх боломжтой. Ялангуяа шөнийн зураг авалтад өндөр гүйцэтгэл үзүүлдэг байна.