Монгол Улс гангийн үйлдвэртэй болох зорилгоор олон улсын нээлттэй тендер зарлахад бэлэн болсныг АҮЭБ-ийн сайд Г.Дамдинням мэдээлэв.

Төслийн урьдчилсан ТЭЗҮ-д тусгаснаар 806 сая ам.долларын хөрөнгө оруулалтаар ган үйлдвэрлэх цогцолбор барихаар төлөвлөөд байгаа. Төслийг хэрэгжүүлснээр жилд нэг сая тонн ган бүтээгдэхүүн, тодруулбал, арматур 500 мянган тн, ган бэлдэц 400 мянган тн, ган бөмбөлөг 100 мянган тн үйлдвэрлэнэ. Мөн жилд 850 мянган тн коксжих нүүрс боловсруулж, 600 мянган тн металлургийн коксоос гадна 60 МВт цахилгаан эрчим хүч үйлдвэрлэж, хэрэгцээнийхээ тодорхой хувийг хангахаар тооцжээ.

Ингэснээр дотоодын ган бүтээгдэхүүний хэрэгцээг хангах, ган боловсруулах дагалдах үйлдвэрийг хөгжүүлэх боломжтойг ажлын хэсгийн гишүүд тус цогцолборыг барих бэлтгэл хангах хурлын үеэр дурдав. Хурлаар гангийн үйлдвэрийн урьдчилсан ТЭЗҮ-тэй танилцаж, олон улсын стратегийн хөрөнгө оруулагч, түншлэгчийг сонгон шалгаруулах төлөвлөгөөг баталсныг АҮЭБЯ мэдээлсэн юм. Ган үйлдвэрлэх цогцолбор барих төсвийн хөрөнгө оруулагч, гүйцэтгэгчийг сонгон шалгаруулах бэлтгэл хангах ажлын хэсгийг Ерөнхий сайдын 2025 оны захирамжаар байгуулсан билээ.

Ган үйлдвэрийн урьдчилсан ТЭЗҮ-г “Эрдэнэс ҮТП” ХХК-ийн Үйлдвэрлэл, технологи, төсөл хөгжүүлэлтийн газрын менежер Г.Ганхуяг танилцуулахдаа, “Монгол Улс өнгөрсөн онд нэг сая тонн ган бүтээгдэхүүн импортолсон. 2030 он гэхэд дотоодын гангийн хэрэглээ 1.7 сая тоннд хүрэх төлөв байгаа тул жилд нэг сая тонн бүтээгдэхүүн үйлдвэрлэх хүчин чадалтай цогцолбор барих тооцоо хийсэн. Үйлдвэрийг ашиглалтад оруулснаар дотоодын гангийн хэрэгцээний 60–70 хувийг хангаж, арматур, ган бөмбөлөг, ган бэлдэц зэрэг бүтээгдэхүүнийг дотоодын үйлдвэрээс хангах нөхцөл бүрдэнэ” гэв.

Сайд Г.Дамдинням “Зөвхөн дотоодын хэрэглээнд тулгуурласан бус, экспортод чиглэсэн бодлогоор гангийн үйлдвэрийг хөгжүүлэх шаардлагатай. Монголд үйлдвэрлэсэн ган Европын зах зээлд 10 хоногт хүргэх боломжтой бол БНХАУ-д үйлдвэрлэсэн ган 60 хонодог нь бидэнд давуу тал юм. Сайн чанарын ган үйлдвэрлэвэл борлуулалтын эрсдэл бага учир авто машин үйлдвэрлэл, салхин сэнс, өрөмдлөгийн тусгай ган зэрэг чиглэлд экспортлох боломжтой”-г тодотгожээ.