УИХ-ын дарга бөгөөд МАН –ын дарга Н.Учрал Ерөнхий сайд Г.Занданшатар хоёр хоорондоо тэрсэлдэж эхлэв үү гэж уншигдаж байна. Тэдний хэлсэн ярьсныг нь харахад хэнд ч тэгж ойлгогдохоор харагдана.УИХ-ын дарга Н.Учрал болохоор “чөлөөлье” гээд байгаа. Ерөнхий сайд Г.Занданшатар болохоор “цэгцрэх хөдөлгөөн” гэнэ.

Ерөнхий сайд бол бүгдийг нь цэгцлээд эрэмбэлээд, жирийтэл жагсаах юм бодоод байх шиг байгаа бололтой. Аа харин намын дарга бөгөөд УИХ-ын даргын санаа бол чөлөөлье, чөлөөтэй бай, хэнээс ч асууж зөвшөөрөл юм аваад байх зүйлгүй. Аль юм болгон ард түмнээ чөдөрлөж бүх юмыг нь зөвшөөрлөөр барих вэ гэсэн. Энэ хоёр санаа бол тэнгэр газар шиг, гал ус шиг харш үйл явдлын тухай яриа юм.

Ард түмний хувьд чөлөөлөгдөөд урт амьсгаа авах гэтэл цэгцрээд гээд жирийтэл эгнүүлээд нэг командаар хөдлөх болчхоод учраа олохоо болилоо. Яагаад ийм хоёр огт ондоо юм яриад хоёр тийшээ яваад байгаагийн учрыг ч олохгүй байна. Сүүлийн улс төрийн судалгаануудаар МАН-ын рейтинг маш доогуур гардаг болсон. Нийгэмд энэ намын нэр төр унаж байна гэсэн үг. Тэгвэл Ардчилсан намынх болохоор өсөөд байгаа.

Харин нэг үнэн юм байгаа нь Ерөнхий сайд Г.Занданшатарт бол намын рейтинг өгсөж уруудах нь нэг их хамааралтай биш. Нам биш Засаг нь сайн ажиллаж байх нь давын өмнө хэрэгтэй. Намын нэр хүндийг намын дарга нь хариуцна. Хариуцлага бол намын даргатай л яригдана. Тэгэхээр олон түмний дунд намын рейтинг унаж байгаа нь Н.Учралтай л холбогдоно. Гэхдээ Засаг нь сайн ажиллаж байж намын нэр хүнд өсөх ёстой. Тааруухан ажиллаж байгаа болоод л намын нэр нь унаж байгаа биз ээ.

Намын нэр хүндээ өсгөхийн тулд Засгийн газрыг сайн ажиллуулах хэрэгтэй. Сайн ажиллуулахын тулд намын дарга нь Ерөнхий сайд хийх ёстой юм. Иймээс энэ хоёр даргын дунд битүү өрсөлдөөн өрнөж түүний илрэл нь энэ хахь ондоо юм яриад хоёр тийшээ яваад байгаагаар илрээд байна уу гэсэн таамаг улс төр судлаачдын дунд шивэр авир яригдах боллоо.

Өдрийн сонин