Боловсролын яам, НҮБ-ын Хүүхдийн сангийн хамтарсан “Багийн бага сургууль” санаачилгын хүрээнд Ховд аймгийн Үенчийн отряд болон Увс аймгийн Боршоо боомтод 75 хүүхдийн хүчин чадалтай багийн бага сургуулийг тус тус нээж, хүүхдүүд гэртэйгээ ойр чанартай боловсрол эзэмших нөхцөл бүрдэв.

Энэхүү санаачилгыг ХААН банк дэмжиж, дөрвөн байршилд бага сургууль барих гурван хөрөнгө оруулалт хийснээр өнөөдөр эхний хоёр нь ийнхүү үүд хаалгаа нээж байна.

Нээлтийн үеэр НҮБ-ын Хүүхдийн сангийн Суурин төлөөлөгч Эваристе Коуасси-Комлан, “Эдгээр жишиг сургууль нь монгол хүүхэд бүр хаана амьдарч байгаагаас үл хамааран тэгш, хүртээмжтэй, чанартай боловсрол эзэмших суурийг тавьж байна. Цаашид энэ санаачилгыг улс орон даяар өргөжүүлэхэд төр засгийн манлайлал, хувийн хэвшлийн идэвхтэй оролцоо, тогтвортой түншлэл нэн чухал” хэмээн онцлов.

“Монгол Улсын ирээдүй болсон бяцхан иргэдэд боловсролыг ойртуулах үнэ цэнтэй төсөлд хамтран ажиллаж буйдаа баяртай байна. “Багийн бага сургууль” санаачилга бол харилцагч, бизнес эрхлэгч, нийгэм улс оронтойгоо хамтдаа өсөж урагшлах эрхэм зорилготой ХААН банкны үнэт зүйлстэй нийцэж байгаа утга төгөлдөр, алсын хараатай төсөл юм” гэж ХААН банкны гүйцэтгэх захирал, НҮБ-ын Хүүхдийн сангийн үндэсний элч Р.Мөнхтуяа сэтгэгдлээ хуваалцлаа.

Шинэ сургуулийн барилга нь Монгол орны эрс тэс уур амьсгалд тэсвэртэй дэд бүтцийн шийдлүүдийг багтаасан бүтээн байгуулалт юм. Агааржуулалт, халаалт, дулаалгын систем, сэргээгдэх эрчим хүчний эх үүсвэр, орчин үеийн ус, ариун цэврийн байгууламж бүхий сургууль-цэцэрлэгийн цогцолбор хэлбэрээр төлөвлөн барьсан байна.

Түүнчлэн сургалтын орчны үндэсний болон олон улсын шаардлага, стандартад нийцсэн хүүхдийн хөгжил, амжилттай суралцахуйг дэмжих нөхцлийг бүрдүүлжээ. Мөн өндөр хурдны интернэт, цахим анги, стандартын гал тогоо зэрэг орчин үеийн тоног төхөөрөмжөөр тоноглосон байна. Энд ажиллах багш нарыг Боловсролын судалгааны үндэсний хүрээлэнгээс холимог бүлгийн сургалтын онол арга зүй болон цахим сургалтын арга барилаар чадавхжуулжээ.

Ашиглалтад орж буй хоёр барилгын зураг болон барилгын ажлыг Хил хамгаалах ерөнхий газрын харьяа нэгж байгууллагуудын мэргэжлийн баг хамт олон хийж гүйцэтгэжээ. Ойрын хугацаанд Төв болон Сэлэнгэ аймгийн гурван багт бага сургуулийг ашиглалтад оруулах аж.