Цахим хөгжил, инновац, харилцаа холбооны яам (ЦХИХХЯ) болон Их Британийн Засгийн газар хамтран Монгол Улсын кибер аюулгүй байдлын эрсдэлийг тодорхойлох судалгааг энэ сарын 27–31-ний хооронд зохион байгуулж байгаа талаар тус яам мэдээллээ.

Энэхүү судалгаа нь Засгийн газрын тогтоолоор баталсан кибер аюулгүй байдлын үндэсний стратегийн хэрэгжилтийг хангах, кибер эрсдэлийн түвшинг тодорхойлж, эрсдэлийг бууруулах төлөвлөгөө гаргах зорилготой. Судалгааг Монголын дотоодын баг Их Британийн кибер аюулгүй байдлын мэргэжилтнүүдтэй хамтран хийж байна.

Британийн Засгийн газар судалгааны аргачлал, асуулга болон эрсдэлийн үнэлгээний загварыг боловсруулсан бөгөөд үүний дагуу дотоодын мэргэжилтнүүд мэдээлэл цуглуулж, байгууллага, салбар, үндэсний хэмжээнд кибер эрсдэлийн тайлан боловсруулах юм.

Судалгааны үр дүнгээр Засгийн газар болон онц чухал мэдээллийн дэд бүтэцтэй байгууллагуудын кибер аюулгүй байдлын түвшинг тодорхойлох, нөөцийн хуваарилалт, хөрөнгө оруулалт, бодлого төлөвлөлтөд үндэслэлтэй шийдвэр гаргах боломж бүрдэх юм. Мөн кибер эрсдэлийг таних, хариу арга хэмжээ авах мэдлэгийг нэмэгдүүлэх ач холбогдолтой гэж ЦХИХХЯ онцолжээ.

Өнөөдөр төр болон хувийн хэвшлийн онц чухал мэдээллийн дэд бүтэц бүхий байгууллагуудад кибер эрсдэлийг таних, үнэлэх, судалгааны ач холбогдлыг таниулах сургалт зохион байгуулсан байна.

Энэхүү судалгаанд төр, хувийн хэвшлийн 40 гаруй байгууллага оролцож байна.

Эх сурвалж: Цахим хөгжил, инновац, харилцаа холбооны яам