Энэ сарын арван нэг, арван хоёрны өдрүүдэд Баян-Өлгий аймгийн Өлгий хотод болсон “Орос хэлийг хэн сайн мэдэх вэ” баруун бүсийн уралдаанд Завхан аймгийн сурагчид амжилттай оролцож, тэргүүн байр эзэллээ. Тэмцээнийг ОХУ-ын шинжлэх ухаан, соёлын төвийн “Русский дом”, Монгол-Оросын найрамдлын нийгэмлэгийн дарга, Монгол Улсын баатар, сансрын нисгэгч Ж.Гүррагчаа нар хамтран зохион байгуулсан байна.
Улиастай сумын Дэвшил сургуулийн сурагчид Э.Будмаа, Н.Наранцэцэг, Б.Түмэнжаргал, МУИС-ийн ахлах сургуулийн Н.Энхжаргал, Жавхлант цогцолбор сургуулийн Г.Бат-Ундараа нар баг болон оролцож “Оюуны довтолгоо”, орос дуу, шүлгийн төрөлд өндөр амжилт гаргаж, баруун бүсдээ тэргүүн байр эзэлжээ. Тэднийг бэлтгэсэн орос хэлний нэмэлт боловсролын төвийн багш Л.Оюунцэцэгийг аймгийн Засаг дарга Г.Өнөрбаяр хүлээн авч, дараагийн тэмцээнд оролцох санхүүжилтийг дэмжихээ амалсан байна.
Баруун бүсийн таван аймгийн нийт гуч гаруй сурагч өрсөлдсөн тус уралдаанд амжилт гаргасан Завханы сурагчид ОХУ-ын их, дээд сургуульд суралцах эрхийн бичгээр шагнуулжээ. Орос хэлний нэмэлт боловсролын төв нь Л.Оюунцэцэг багшийн санаачилгаар есөн жилийн өмнө байгуулагдсан бөгөөд улсдаа дараалан тэргүүлж, 2023, 2024 оны Гран при шагнал хүртсэн юм. Өдгөө тус төвд дөчин гаруй хүүхэд суралцаж, жил бүр хэд хэдэн сурагч ОХУ-ын тэтгэлэгтэйгээр суралцах эрх авч байна.
Эх сурвалж: Завхан аймгийн ЗДТГ, Русский дом.
