Өмнөговь аймгийн “Өсөлттэй Өмнөговь” хөгжлийн төлөвлөгөөний хүрээнд хэрэгжиж буй “Залуус дэд” хөтөлбөрөөс залуучуудын хөгжлийн сарын аяныг зарлан, “Эерэг хандлага-идэвхтэй залуучууд” нөлөөллийн үйл ажиллагааг энэ сарын 21-ний өдөр зохион байгууллаа.

Арга хэмжээний үеэр шүлэг, яруу найраг сонирхогч хүүхэд, залуусын дунд “Залуус ба яруу найраг” сэдвээр уншлага, уулзалтыг зохион байгуулж, МЗЭ-ийн гишүүн, “Цагаан уул” болон “Болор цом” наадмын эзэн, яруу найрагч Сайнжаргалын Начин урилгаар оролцож, уран бүтээлийнхээ туршлагаас хуваалцсан байна.

Уулзалтад аймгийн төв номын сангийн “Их говийн дуулал” дугуйлангийн сурагчид болон I, IV сургуулийн сурагчид, орон нутгийн уран бүтээлчид нийт 100 орчим хүн оролцож, шүлэг найраг уншиж, харилцан яриа өрнүүлжээ.

Энэхүү арга хэмжээ нь залуусын хэл соёл, уран илтгэх чадварыг дэмжихийн зэрэгцээ эх хэлний дархлааг бэхжүүлж, шүлэг найраг бичих урам зориг, бүтээх хүсэл тэмүүллийг нэмэгдүүлэхэд чиглэжээ.