Өнгөрсөн наймдугаар сард нээлтээ хийсэн даруйдаа дэлхий даяар 238 сая долларын орлого олж, сүүлийн арван жилийн хугацаанд гарсан хамгийн амжилттай романтик инээдмийн киногоор нэрлэгдээд байгаа "Crazy Rich Asians" киног үзсэн хүн бүр адал явдлын үргэлжлэлийг хүлээж байгаа гэдэгт итгэлтэй байна.
Сингапурын зохиолч Кевин Кваны ижил нэртэй зохиолоос сэдэвлэгдэн бүтээгдсэн энэхүү кинонд зөвхөн Ази жүжигчид тоглосон нь Холливүүдэд тохиосон ховор үзэгдэл болоод зогсохгүй, үзэгчдээс асар өндөр үнэлгээ аваад байсан билээ. Зохиолч Кевин Кваны гурван бүлэгт номоос сэдэвлэсэн уг "Crazy Rich Asians" кино нь дахин хоёр анги гаргахаар төлөвлөжээ.
Гэхдээ дараагийн ангийн зураг авалт 2020 оноос эхлэх аж. Deadline вебсайтын мэдээлсэнээр киноны найруулагч Жон М.Чу алдарт Тонигийн шагналт "In the Heights" нэртэй мюзиклийн бүрэн хэмжээний кинон дээр ажиллаж байгаа гэнэ.
Сайхан мэдээ гэвэл ирээдүйн хоёр ангийн зураг авалтыг зэрэг хийхээр болжээ. Шүтэн бишрэгчид хоёр ба гуравдугаар ангийг удаан хүлээх шаардлагагүй юм.
Мөн Deadline вебсайтын мэдэгдсэнээр гол дүр болох Николас Янгийн дүрд тоглосон жүжигчин Хенри Голдинг дүрдээ дуртайяа эргэн ирэх болно гэдгээ албан ёсоор мэдэгдсэн. Харин бусад жүжигчид одоогоор албан ёсны хариу хэлээгүй байгаа юм.
"Crazy Rich Asians" кино нь гурван боть номоос бүрддэг ба дараагийн боть болох "China Rich Girlfriend" номонд гол дүрийн бүсгүй Рэйчел Чу өөрийн төрсөн эцгээ хайж байгаагаар үйл явдал өрнөдөг бол "Rich People Problems" нэртэй сүүлчийн номонд Николас Янгийн эмээгийн бие муудсанаар түүний өв хөрөнгийг гэр бүлийн гишүүд нь булаацалддаг тухай гарна.
Гэвч дараа, дараагийн ангиуд номын зохиолоор үргэлжлэх нь тодорхойгүй байгаа юм. Учир нь найруулагч Жон М.Чу өмнө нь киноны дараагийн ангид Астрид болон Чарли нарын харилцааг илүү дэлгэрэнгүй харуулах болно гэсэн билээ. Тэгэхээр киногоо хүлээх л үлдлээ.
