Налайх дүүргийн “Тайж Хайрхан”-ы бэлд энэ сарын 22-24-нд “Нүүдэлчин” дэлхийн соёлын фестиваль зохион байгуулагдав. Фестивалийн үеэр үндэсний бөх, сур болон шагай харваа, адуучин гэсэн дөрвөн төрөлд 400 гаруй тамирчин, хурдан морины уралдаанд 100 гаруй хүлэг морь бүртгүүлсэн байна.
Соёл, спортын өргөн хүрээтэй арга хэмжээнд үзүүлбэр, сургалт, үзэгчдэд зориулсан нээлттэй тэмцээнүүд мөн багтжээ.
“Нүүдэлчин-2024” фестивалийн үндэсний бөхийн барилдаанд Өвөрхангай аймгийн Уянга сумын харьяат, улсын харцага Х.Гантулга түрүүлэв. Хурдан морины их насны уралдаанд Төв аймгийн Аргалант сумын уугуул, аймгийн алдарт уяач Д.Батаагийн цавьдар түрүү магнайд хурдаллаа.
Сур харваанд эрэгтэйчүүдийн ангилалд улсын мэргэн Т.Очироо, эмэгтэйчүүдийн ангилалд аймгийн гарамгай харвач Ч.Чимэддулам нар түрүүлэв. Шагай харвааны багийн төрөлд Дорноговь аймгийн “Номт даншиг Хеттрик групп”-ийн баг, цуваа харваанд Төв аймгийн Баян сумын харьяат, “Цэц баян” багийн харваач Г.Чингүүн тэргүүллээ. Адуучин тэмцээнд Багануур дүүргийн адуучин Б.Бямбасүрэн түрүүлжээ.
Эх сурвалж: Соёлын яам
Сэтгэгдэл (1)